Gísli Helgason tónlistarmaður, varð sjötugur í síðasta mánuði og að því tilefni hélt Hálft í hvoru tónleika í Eldheimum í gærkvöldi. 

Hálft í hvoru og gestir Eldheima sungu afmælissönginn fyrir Gísla og síðan tóku þeir félagar við og sungu sín lög og annarra. Fram kom að Hálft í hvoru hefðu byrjað að spila í Mylluhól í Höllinni þegar sá staður opnaði 11. maí 1984.

Ástæða þess að þeir voru ráðnir að spila við opnunina var sú að þeir höfðu verið að spila hér stuttu áður og þegar þeir flugu til Reykjavíkur daginn eftir í lítilli flugvél í miklu óveðri. Flugvélin lét illa í loftinu og menn töldu daga sína alla og vélin myndi farast á leiðinni suður. Ásmundur Friðriksson sem rak Samkomuhúsið á þessum tíma sat fyrir framan Hálft í hvoru í flugvélinni, eftir einhver ólæti í vélinni snéri hann sér aftur og sagði við strákana: „Ef við komust lífs af úr þessari flugferð þá spilið þið við opnun Mylluhóls.” 

Allir lifðu flugferðina af og Hálft í hvoru spiluðu við opnun Mylluhóls. Þar byrjaði ótrúlegt ævintýri hjá hljómsveitinni og spiluðu þeir mjög oft á Mylluhól. Svo oft að margir á fastalandinu töldu að Hálft í hvoru væri hljómsveit frá Eyjum.

Hljómleikarnir í Eldheimum voru vel sóttir og leikin voru ýmis lög. Þar á meðal vinsæl lög hljómsveitarinnar, þjóðhátíðarlögin þeirra og lög Oddgeirs Kristjánssonar.