Þann 1. janúar urðu nokkrar breytingar á skipulagi almenningsvagna í framhaldi af útboði Vegagerðarinnar í vor. Nýir aðilar taka við akstri flestra leiða nema á Austurlandi og Vestfjörðum.
Vegagerðin annast skipulag almenningssamgangna á landsbyggðinni. Hún sér þannig um skipulag á akstri almenningsvagna á milli sveitarfélaga og þéttbýlissvæða, á rekstri ferja og að haldið sé úti flugi á ákveðna staði.
Akstur almenningsvagna á landsbyggðinni hefur á undanförnum árum verið á herðum margra verktaka en rekstur hefur miðast við hverja akstursleið fyrir sig. Til að einfalda rekstur og fá betri yfirsýn yfir hvert landsvæði var ákveðið að bjóða út akstur á landsbyggðinni með nýjum hætti síðastliðið vor, að því er segir í frétt á vef Vegagerðarinnar.
Sjá einnig: Áætlun Strætó ekki í samræmi við nýja áætlun Herjólfs
Ríkiskaup fór með umsjón útboðsins fyrir hönd Vegagerðarinnar. Útboðið var í fjórum hlutum: Vestur- og Norðurland, Norður- og Norðausturland, Suðurland og Suðurnes. Hægt var að senda inn tilboð í einstaka hluta útboðsins eða alla fjóra.
Niðurstaðan var að taka tilboði Hópbíla um Vestur- og Norðurland, Suðurland og Suðurnes, og tilboði SBA um Norður- og Norðausturland.
Hér fyrir neðan eru breytingar sem verða gerðar hjá Strætó á Suðurlandi frá og með 1. janúar 2021.
Suðurland:
Leið 51:
- Föstudagsferðirnar kl. 14:50 frá FSU til Hvolsvallar og kl. 15:48 frá Hvolsvelli til FSU verða lagðar niður.
- Akstur hættir á milli Víkur í Mýrdal og Hafnar í Hornafirði á miðvikudögum.
Leið 71:
- Ferðirnar kl. 17:48 frá Þorlákshöfn til Hveragerðis og kl. 18:10 frá Hveragerði til Þorlákshafnar hætta akstri. Síðasta ferð dagsins verður kl. 16:22 frá Hveragerði til Þorlákshafnar.
Leið 72:
- Hættir akstri á sunnudögum.
Allar nánari upplýsingar er að finna á heimasíðu Strætó bs., www.straeto.is.
