„Já, í ljósi reynslunnar deili ég þessum áhyggjum. Þegar lægstbjóðandi sá um þessa dýpkun síðast reyndist tækjakostur þeirra hvorki nógu afkastamikill né áreiðanlegur og tók dýpkunin oft langan tíma. Þetta hefur verið í betra horfi síðan núverandi aðili tók við þessu verkefni.”

Þetta segir Íris Róbertsdóttir, bæjarstjóri í Vestmannaeyjum aðspurð um hvort hún deili áhyggjum af niðurstöðum útboðsins um dýpkun Landeyjahafnar næstu árin.

Sjá einnig: Björgun bauð lægst í dýpkun Landeyjahafnar

„Af þessum ástæðum hafði ég samband við Vegagerðina strax og niðurstaða útboðsins lá fyrir og lýsti þessum áhyggjum okkar. Þeir svara því til að auðvitað séu gerðar ákveðnar kröfur í þessum efnum í útboðsgögnunum sem bjóðendur í verkið verði að uppfylla. Ég óskaði engu að síður eftir fundi með Vegagerðinni áður en gengið verður til samninga á grundvelli útboðsins og á það var fallist. Sá fundur verður í næstu eða þarnæstu viku.” segir Íris.

Þessu tengt: Vegna útboðs á dýpkun Landeyjarhafnar næstu þrjú ár