Í síðustu viku var haldinn aðalfundur Vestmannaeyjadeildar Rauða krossins. Sigurður Ingi Ingason er formaður félagsins.
„Á fundinum var farið yfir hefðbundin aðalfundarmál, s.s. skýrslu stjórnar um starf fyrra árs, ársreikningar lagðir fram til samþykktar, fjárhagsáætlun næsta árs lagðir fram, o.s.frv. Í lokin er orðið laust og þá eru hin ýmsu mál rædd.“ segir Sigurður Ingi í samtali við Eyjar.net.
Aðspurður um breytingar á stjórn segir formaðurinn að ein breyting hafi orðið á varamanni í stjórn, en Guðrún Snæbjörnsdóttir hætti eftir nokkura ára starf og inní varastjórn kom Sara Jóhannsdóttir í hennar stað.
Er Sigurður er inntur eftir hvað framundan sé hjá félaginu segir hann að helstu verkefni Rauða krossins í Vestmannaeyjum séu nokkuð hefðbundin á milli ára, s.s. fatasöfnun í safngámana við Eimskipshúsið niðrá Eiði sem Þórunn Jónsdóttir hefur séð um með miklum myndarskap undanfarin ár.
„Svo vorum við svo heppin að fá til okkar aðila sem kláraði skyndihjálparnám síðastliðið haust, þannig að nú erum við komin með aðila sem getur séð um skyndihjálparnámskeið, eitthvað sem við höfum verið í vandræðum með eftir að við misstum aðila til Reykjavíkur sem hafði séð um námskeiðin.
Svo er eitt og annað sem í gangi, s.s. heimsóknarvinir, Geir Jón Þórisson hefur mætt reglulega uppá Hraunbúðir og lesið fyrir heimilisfólk þar.
Að lokum langar mig að hvetja fólk til að gefa sér tíma í sjálfboðaliðastarf, hvort sem það er hjá Rauða krossinum eða annarsstaðar. Það er vel tekið á móti öllum og starfið er mjög gefandi.“ segir Sigurður Ingi að endingu.
