Á mánudaginn var greint frá því að fiskeldisfyrirtækið Laxey hafi lokið við 6 milljarða hlutafjárútboð með innkomu öflugra innlendra og erlendra fjárfesta með mikla reynslu af fiskeldi. Meðal nýrra hluthafa er Blue Future Holding sem er leiðandi fjárfestir í útboðinu. Einnig Nutreco, Seaborn, Kjartan Ólafsson og öflugt hollenskt sjávarútvegsfyrirtæki ásamt lífeyrissjóðum.
Fram kom í tilkynningu félagsins að Blue Future Holding, sé hluti af þýsku fjölskyldusamsteypunni EW Group, og er Blue Future Holding leiðandi fjárfestir í útboðinu.
Tekjur af landeldi gætu tífaldast frá árinu 2021 fram til ársins 2032
Eyjar.net ræddi við Jón Bjarka Bentsson, aðalhagfræðing Íslandsbanka um fjármögnunina og hvaða þýðingu slíkt hafi fyrir bæjarfélag eins og Vestmannaeyjar.
„Það hljóta að teljast jákvæð tíðindi fyrir íbúa Vestmannaeyja að búið sé að tryggja áframhaldandi uppbyggingu á landeldi þar. Annars vegar fellur slík starfsemi ágætlega að atvinnulífi á eyjunni þar sem sjávarútvegur hefur löngum verið undirstaðan en að sama skapi lýtur eldið að mörgu leyti öðrum lögmálum. Framleiðsla og markaður fyrir eldisfisk, sér í lagi landeldi, á að ýmsu leyti meira skylt með landbúnaði og tengdri matvælaframleiðslu en hefðbundnum sjávarútvegi. Reksturinn, og þar með fjöldi starfa og skatttekjur, er til að mynda mun stöðugri en t.d. í loðnuveiðum og -vinnslu, nokkuð sem Vestmannaeyingar þekkja vel frá síðustu misserum.
Fiskeldi, og sér í lagi landeldi, á eftir að verða helsti vaxtabroddur í fiskútflutningi á komandi árum og til að mynda var nýlegt mat Boston Consulting Group á þá leið að tekjur af landeldi gætu tífaldast frá árinu 2021 fram til ársins 2032. Það hlýtur að vera dýrmætt fyrir samfélag eins og Vestmannaeyjar að geta boðið upp á störf og fá aukin umsvif, fyrst vegna uppbyggingarinnar og í kjölfarið vegna starfseminnar sjálfrar.“