ÍBV og Valur mætast í undanúrslitum Coca Cola bikars kvenna, en dregið var í hádeginu í dag. Undanúrslitaleikirnir verða leiknir fimmtudaginn 7. mars. Leikur ÍBV og Vals verður fyrri viðureign dagsins. Flautað verður til leiks klukkan 18.
Bikarmeistarar Fram mæta Stjörnunni í hinni viðureign undanúrslitanna. Sá leikur hefst klukkan 20.15. Sigurlið undanúrslitanna eigast við í úrslitaleik keppninnar laugardaginn 9. mars. Undanúrslitaleikirnir og úrslitaleikurinn fara fram í Laugardalshöllinni.
