Mun meira mældist af makríl

24.Ágúst'22 | 10:30
makríl

Útbreiðsla makríls var mun meiri við Ísland í ár samanborið við síðustu tvö ár.

Lokið er samantekt á niðurstöðum sameiginlegs uppsjávarleiðangurs Íslendinga, Færeyinga, Norðmanna og Dana sem farinn var á tímabilinu 1. júlí til 3. ágúst 2022. 

Meginmarkmið leiðangursins var að meta magn uppsjávarfiska í Norðaustur-Atlantshafi að sumarlagi en jafnframt að rannsaka vistkerfi og umhverfi sjávar. Leiðangurssvæði var 2,9 milljón ferkílómetrar sem er 32% stærra en síðasta ár þar sem nú var að nýju farið inn í grænlenska landhelgi og suður af 61°N breiddargráðu í Íslandsdjúpi og á Reykjaneshrygg, segir í tilkynningu frá Hafrannsóknarstofnun.

Vísitala lífmassa makríls var metinn 7,37 milljónir tonna sem er 43% hækkun frá árinu 2021 og er nálægt langtímameðaltali gagnaseríu (7,28 milljónir tonna). Byggir vísitalan á afla í alls 247 stöðluðum yfirborðstogum á fyrirfram ákveðnum stöðvum. Tvær togstöðvar voru með einstaklega mikinn afla, eða 70 og 103 tonn á km2. Reiknaður lífmassi fyrir þessar tvær stöðvar er um þriðjungur af heildarlífmassa. Án þessara tveggja stöðva væri reiknaður lífmassi 2022 svipaður og 2021.

Útbreiðsla makríls var mun meiri við Ísland í ár samanborið við síðustu tvö ár og mældist makríll fyrir austan, sunnan og vestan landið (sjá mynd neðar). Fyrir sunnan land náði útbreiðslan yfir landgrunnið og suður að 61°N. Mesti þéttleikinn var fyrir suðaustan landið og síðan fyrir vestan. Alls mældist 18,9% af heildarlífmassa makríls í íslenskri landhelgi samanborið við 7,7% síðast ár. Líkt og undanfarin ár mældist meirihluti stofnsins í Noregshafi en minna mældist í norðanverðu Noregshafi.

Samkvæmt gervihnattagögnum var meðaltalshitastig í yfirborðslögum sjávar austan og norðan Íslands lægra í júlí en á sama tíma í fyrra og einnig undir meðaltali síðustu 20 ára. Í suðurhluta Noregshafs var yfirborðshiti einnig undir meðaltali síðustu 20 ára en yfir langtímameðaltali í norður hlutanum.

Vísitala um magn dýrasvifs á hafsvæðinu í júlí við Ísland og í Noregshafi var af svipaðri stærðargráðu og á síðasta ári og lág í sögulegu samhengi leiðangursins.

Í leiðangrinum voru bergmálsmælingar einnig notaðar til að meta magn norsk-íslenskrar síldar og kolmunna en úrvinnsla á þeim mælingum er ólokið og verða þær niðurstöður kynntar 30. september næstkomandi.

Niðurstöður leiðangursins fyrir makríl voru kynntar innan stofnmatsvinnunefndar Alþjóðahafrannsóknaráðsins (ICES) í dag. Þær eru, ásamt öðrum gögnum, notaðar við mat á stofnstærð makríls en ICES mun birta ráðgjöf um aflamark næsta árs fyrir makríl, norsk-íslenska síld og kolmunna þann 30. september næstkomandi.

Smelltu hér til að lesa skýrslu um bráðabirgðaniðurstöður leiðangursins.

Mynd. Vísitala um magn makríls reiknuð fyrir reiti (2 breiddargráður og 4 lengdargráður) í júlí og ágúst 2022. Enginn makríll mældist í hvítum reitum og gulur til rauðs litakvarða táknar vaxandi þéttleika sem tonn á ferkílómetra. Stærð hringja sýnir magn makríls á togstöðvum sem tonn á ferkílómetra og grár kross táknar togstöðvar þar sem enginn makríll veiddist.

Má bjóða þér að auglýsa hér?

23.Júní'22

Hér má auglýsa allt milli himins og jarðar! Sendu línu á [email protected] og saman finnum við lausn sem hentar þér.

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Hlaðvarpsþættirnir eru aðgengilegir hér á Eyjar.net og einnig á helstu veitum, svo sem Spotify. Sjá nánar hér...

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).