Ísak Rafnsson til ÍBV

Ísak þarf nú ekki að kynna fyrir handboltaáhugafólki en hann kemur til liðs við ÍBV frá uppeldisfélagi sínu, FH. Hann hefur leikið allan sinn feril hér heima á Íslandi með FH en lék tímabilið 2018-19 með austurríska liðinu Schwaz Hand­ball Tirol.

Ísak er hávaxinn og sterkur leikmaður og hefur verið einn af betri varnarmönnum Olísdeildarinnar um nokkurra ára skeið. Koma Ísaks til ÍBV er mikið gleðiefni og mun hann styrkja liðið okkar fyrir átökin næstu tímabil, segir í tilkynningu frá handknattleiksdeild ÍBV.

Það er gaman að geta þess að unnusta Ísaks er Sigríður Lára Garðarsdóttir, sem Eyjamenn þekkja vel úr fótboltanum hér í gegnum tíðina.

Á meðfylgjandi mynd má sjá Ísak og Grétar Þór, formann handknattleiksdeildar ÍBV, handsala samkomulagið við undirritun. Ísak er boðinn hjartanlega velkominn í ÍBV fjölskylduna, segir að endingu í  tilkynningunni.