Enn ekki nægt varaafl til staðar í Eyjum

Fram kemur í fundargerðinni að Íris Róbertsdóttir, bæjarstjóri hafi fundað með ráðherra orkumála í byrjun mánaðarins. Á fundinum fór bæjarstjóri yfir stöðuna á rafmagnsþörf, forgangsorku, varaafli, flutningskerfi, gjaldtöku og þörf með tilliti til orkuskipta. Þá hefur bæjarstjóri óskað eftir því við 1. þingmann kjördæmisins að þingmenn kjördæmisins fundi með bæjarráði vegna málsins.

Landsneti ber lögum samkvæmt að tryggja varaafl fyrir forgangsorku. Það varaafl er ekki til staðar í Vestmannaeyjum í dag. Bæjarstjóri lagði til við bæjarráð að ráðið myndi senda formlegt erindi á Landsnet vegna færanlegra varaaflsstöðva til að hægt sé að tryggja eins mikið varaafl og mögulegt er á loðnuvertíðinni.

Í afgreiðslu ráðsins segir að bæjarráð þakki upplýsingarnar og samþykkir tillögu bæjarstjóra um að senda formlegt erindi á Landsnet vegna færanlegra varaaflsstöðva til Vestmannaeyja.