Íbúum fjölgar í Eyjum, en Íslendingum fækkar

Árið 2010 voru 4135 búsettir í Vestmannaeyjum. Hefur því fjölgað um 273 í bæjarfélaginu síðan þá.

Í þingkosningunum í síðasta mánuði voru alls 3067 á kjörskrá í Eyjum. Það var fækkun upp á 90 miðað við Alþingiskosningarnar árið 2017, en þá voru 3.157 á kjörskrá. Hvað skýrir þessa staðreynd að á meðan íbúum fjölgar, þá fækki á kjörskrá.

Erlendir ríkisborgarar úr 140 í 530 á rúmum áratug

Eyjar.net hefur rýnt tölurnar betur og í ljós kemur að erlendum ríkisborgurum hefur fjölgað mikið í Eyjum undanfarin áratug. Árið 2010 voru búsettir í Eyjum 140 erlendir ríkisborgarar. Í ár eru þeir hins vegar 530, eða um 12% bæjarbúa.

Sjá einnig: Mun fleiri börn fæddust í fyrra en árin á undan

67 ára og eldri fjölgað um rúmlega 50%

Einnig er athyglisvert að skoða breytta aldurssamsetningu í sveitarfélaginu. En börnum undir 18 ára aldri hefur fækkað í Eyjum á umliðnum áratug um ríflega 18%. Þau voru samtals 1071 árið 2010, en eru í dag 904 talsins. Á sama tíma hefur 67 ára og eldri fjölgað um rúmlega 50% úr 449 í 678.

Þessu tengt: Aldursskiptingin í Eyjum - samfélagið er að eldast

Þessar tölur gefa vísbendingu um að vinnuafl með erlent ríkisfang hafi vaxið verulega síðasta áratuginn í Eyjum og má áætla að í dag séu nærri 3 af hverjum 10 á vinnumarkaðnum með erlent ríkisfang.

Heimildir/Hagstofan og Vestmannaeyjabær.