Tímamót á HSU í Eyjum

Fjaraugnlækningar - fyrstar sinnar tegundar á Íslandi

2.Október'21 | 13:05
fjaraugnlaekningar_hsu_is

Fulltrúar HSU, Sjónlags og Lions. Ljósmynd/hsu.is

Það var mikill gleðidagur í Vestmannaeyjum í gær þegar opnuð var fjaraugnlæknisþjónusta á Heilbrigðisstofnun Suðurlands. 

Díana Óskarsdóttir, forstjóri HSU segir í pistli á vef stofnunarinnar að í húsakynnum HSU í Vestmannaeyjum sé búið að koma fyrir tækjabúnaði af nýjustu gerð sem samanstendur af sjónsviðsmæli, sneiðmyndatæki, raufarlampa, augnbotnamyndavél og augnþrýstimæli. Þessi nýjung í þjónustu HSU er tilraunaverkefni sem unnið er í samvinnu við Sjónlag í Reykjavík. Starfsmaður HSU hefur verið þjálfaður til að nota tækin sem sendir stafrænar myndir til sérfræðinga Sjónlags í Reykjavík til greiningar. Þjónustan mun nýtast bæjarbúum í greiningum og eftirliti á augnsjúkdómum.

Binda miklar vonir við fjarlækningar til að efla sérhæfða þjónustu á landsbyggðinni

Þetta er gríðarlega spennandi verkefni í fjaraugnlækningum sem er fyrsta sinnar tegundar á Íslandi. Verkefnið hlaut nýsköpunarstyrk stjórnvalda á síðasta ári, en aðal fjármögnunin kemur frá Lionshreyfingunni. Lionsklúbbur Vestmannaeyja leiddi söfnunina meðal einstaklinga, félagasamtaka og fyrirtækja í Vestmannaeyjum sem eru bakhjarlar gjafarinnar, en helmingur fjármögnunarinnar kemur frá alþjóðahjálparsjóði Lionssamtakana (LCIF). Það er alveg ljóst að þetta stórkostlega framtak Lionssamtakanna hefur gert verkefnið að veruleika og færi ég þeim mínar bestu þakkir.

Kveikjan að verkefninu má rekja til þess að erfiðlega hefur gengið að fá augnlækna til Vestamanneyja sem og á aðra staði á landsbyggðinni, auk þess sem sérhæfing á þessu sviði er orðin mun meiri en áður. Í ljósi þess hvað tæknin og sérhæfing í læknisþjónustu hefur fleygt fram á síðustu árum bindum við miklar vonir við fjarlækningar til að efla sérhæfða þjónustu á landsbyggðinni. Ekki dugir lengur að einn augnlæknir ferðist með læknatöskuna sína um landið, slík hefur þróunin verið í augnlækningum á síðustu áratugum. Það liggur því ljóst fyrir að við verðum að tileinka okkur tæknilausnir sem þessa í ríkari mæli.

Mun án efa fækka ferðum til Reykjavíkur bæði vegna greininga og eftirfylgni

Ég vona svo sannarlega að bæjarbúar muni nýta sér þessa fjarþjónustu sem nú verður í boði á HSU og mun hún án efa fækka ferðum íbúa Vestmannaeyja til Reykjavíkur bæði vegna greininga og eftirfylgni í augnlæknisþjónustu.

Ég vil koma á framfæri þakklæti til allra sem hafa komið að þessu verkefni með einum eða öðrum hætti. Einnig óska ég bæjarbúum, HSU og Sjónlagi til hamingju með þetta spennandi tilraunaverkefni sem ég vona að eigi eftir að þróast áfram og vaxa á landsvísu á komandi misserum, segir Díana Óskarsdóttir, forstjóri HSU.

 

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.