Njáll sækist eftir 3. - 4. sæti í prófkjöri Framsóknarflokksins

11.Maí'21 | 12:20
nr_1119

Njáll Ragnarsson

„Eftir góða umhugsun og hafandi fengið hvatningu úr ýmsum áttum hef ég ákveðið að láta slag standa og gefa kost á mér í 3. - 4. sæti í prófkjöri Framsóknarflokksins í Suðurkjördæmi sem haldið verður þann 19. júní nk.”

Þetta kemur fram í tilkynningu frá Njáli Ragnarssyni, oddvita Eyjalistans. Njáll er 37 ára gamall og er fæddur og uppalinn í Vestmannaeyjum. Hann er kvæntur Matthildi Halldórsdóttur og saman eiga þau Lindu Björk sem er 19 ára og Kolbrá sem er sjö ára.

„Eftir nám í Framhaldsskólanum í Vestmannaeyjum hélt ég til Reykjavíkur og kláraði BA í stjórnmálafræði við HÍ árið 2008. Við tóku nokkur ár í höfuðborginni en að lokum flutti ég aftur heim til Eyja árið 2011 og réði mig sem framkvæmdastjóra Fiskmarkaðs Vestmannaeyja þar sem ég var í tæp fjögur ár. Í dag starfa ég sem deildarstjóri hjá Fiskistofu og samhliða því stunda ég nám á meistarastigi í opinberri stjórnsýslu við Háskóla Íslands.

Í sveitarstjórnarkosningunum 2018 leiddi ég sameiginlegt framboð Framsóknar, Samfylkingar, VG og óháðra. Ég náði kjöri í bæjarstjórn og hef á sama tíma setið sem formaður bæjarráðs. Það eru miklar áskoranir að leiða saman ólíka hópa með ólíkar skoðanir og ég tel að framsóknarfólk sé einmitt límið sem þarf til þess að leysa slík verkefni með farsælum hætti.

Starfið í bæjarstjórn hefur verið ótrúlega skemmtilegt og þroskandi en jafnframt krefjandi. Ég hef frá því ég var krakki haft mikinn áhuga á pólitík og það að geta gert samfélaginu gagn er mér mjög dýrmætt. Ég vil nú leggja mitt lóð á vogarskálarnar til þess að framboðslisti okkar framsóknarmanna verði sem sterkastur, vitandi það að 3. sætið verður baráttusætið í kosningunum í haust.

Ég býð fram þekkingu mína af sjávarútvegi og þá reynslu sem ég hef öðlast í bæjarmálunum í Vestmannaeyjum og tel að þetta gagnist flokknum og framboðslista okkar í haust. Ég hef mikinn áhuga á því að tryggja dreifða og öfluga byggð í landinu auk þess sem ég hef verið talsmaður þess að styðja við nýsköpun og sprotastarfsemi og að tryggja litlum og meðalstórum fyrirtækjum umhverfi til þess að vaxa og dafna. Fyrir þetta ætla ég að standa hér eftir sem hingað til.

Nú óska ég eftir stuðningi Vestmannaeyinga. Eins og fyrr segir fer prófkjörið fram 19. júní n.k. og þeir geta tekið þátt sem skráðir eru í flokkinn fyrir 19. maí n.k. Hægt er að skrá sig rafrænt hér.

Áfram veginn!” segir í tilkynningu frá Njáli Ragnarssyni.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Mannlíf og saga - hlaðvarp

2.Mars'21

Nýtt hlaðvarp/podcast fer í loftið á fimmtudaginn 4. mars nk. Nýr þáttur kemur út á hverjum fimmtudegi og verður hlaðvarpið aðgengilegt á Eyjar.net ásamt helstu veitum svo sem Spotify og Youtube. Fylgstu með...

Fasteignasalan Eldey

11.Maí'21

Eldey fasteignasala.  Sími 861-8901.  Arndís M. Kjartansdóttir löggiltur fasteignasali.  Goðahrauni 1.  disa@eldey.net.  Lægsta söluþóknunin í Eyjum, 1 % fyrir einkasölu.