Pönnusteikta loðnan lukkaðist sérlega vel

6.Mars'21 | 09:12
lodna_eldud_vsv

Wenyi Zeng á Canton fór einföldu leiðina með hráefnið. Mynd/vsv.is

Wenyi Zeng kokkur á veitingastaðnum Canton fer létt með að sýna og sanna að loðna er ljómandi góður matur. 

Hún steikti hængi og hrygnur á pönnu í hádeginu í gær og hefði fengið margar stjörnur hjá Jónasi heitnum Kristjánssyni matrýni fyrir ferskleika hráefnis og einfalda en ljúfmannlega matreiðslu, segir í frétt á fréttasíðu Vinnslustöðvarinnar.

Hún lét fiskinn stikna í lítilræði smjörlíkis, stráði fyrst örlitlum sykri yfir og kryddaði svo. Hádegismatur sem sagði sex, jafnvel sjö. Hrygnan fær eina stjörnu umfram hænginn, þökk sé hrognafyllingunni.

Loðna hefur engri festu náð í matarmenningu Íslendinga og þarf auðvitað að veiðast til að eiga möguleika á slíku. Úlfar Eysteinsson matreiðslumeistari prófaði forðum daga að bjóða þurrkaða loðnu að japönskum hætti sem eins konar snakk á veitingastaðnum sínum í Reykjavík en náði ekki að heilla barflugur að marki.

Stefán Úlfarsson matreiðslumeistari á Þremur frökkum reyndi líka fyrir sér með loðnu og birti fyrir margt löngu í Morgunblaðinu uppskrift að loðnuforrétti til að „matreiða í næsta matarborði þegar mikið liggur við.“  Hann gerði ráð fyrir að velta loðunni upp úr eggjum og hveiti fyrir steikingu í smjörlíki. Fleiri uppskriftir í svipuðum dúr er að finna á Vefnum ef að er gáð og gjarnan látið fylgja með að steikt loðna sé fyrirtaks forréttur. Einn kaldur á borðkantinum með réttinum telst bónusánægja.

Wenyi Zeng á Canton fór einföldu leiðina með hráefnið. Það lukkaðist sérlega vel, segir í fréttinni.

 

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.