Helga Jóhanna og Leifur tilnefnd í skólanefnd FÍV

Á fundi bæjarstjórnar Vestmannaeyja í síðustu viku var tekin fyrir ósk Mennta- og menningarmálaráðuneytisins um tilnefningu í skólanefnd Framhaldsskólans í Vestmannaeyjum 2021-2025, en skipunartíma núverandi skólanefndar Framhaldsskólans í Vestmannaeyjum lýkur þann 20. mars nk.

Ráðuneytið óskaði eftir að Vestmannaeyjabær tilnefndi tvo aðalfulltrúa og aðra tvo til vara í skólanefnd framhaldsskólans og að þær tilnefningar berist ráðuneytinu eigi síðar en 5. mars nk.

Bæjarstjórn ákvað að tilnefna þau Helgu Jóhönnu Harðardóttur og Leif Jóhannesson sem aðalfulltrúa skólanefndar Framhaldsskólans í Vestmannaeyjum og þau Kára Bjarnason og Silju Rós Guðjónsdóttur sem varafulltrúa skólanefndarinnar.