Sjálfstæðismenn halda prófkjör í Suðurkjördæmi

7.Febrúar'21 | 19:15

Ásmundur Friðriksson og Vilhjálmur Árnason hyggjast gefa kost á sér í komandi prófkjöri. Ljósmynd/TMS

Aðalfundur Kjördæmisráðs Sjálfstæðisflokksins í Suðurkjördæmi ákvað á aðalfundi sínum í gær að viðhafa prófkjör við uppröðun á efstu sætum framboðslista fyrir kosningar til Alþingis haustið 2021.

Prófkjörið fer fram 29. maí nk., að því er segir í frétt á heimasíðu flokksins.

Þar segir jafnframt að þátttaka í prófkjörinu verði heimil öllum fullgildum meðlimum sjálfstæðisfélaganna í kjördæminu sem þar eru búsettir. Einnig þeim stuðningsmönnum Sjálfstæðisflokksins sem munu eiga kosningarétt í kjördæminu við kosningarnar 25. september 2021 og hafa undirritað inntökubeiðni í sjálfstæðisfélög í kjördæminu fyrir lok kjörfundar og teljast þar með komnir á flokksskrá.

Á fundinum var kjörið í stjórn, flokksráð og miðstjórn en Ingvar P. Guðbjörnsson á Hellu var endurkjörinn formaður til næsta starfsárs. Kjördæmisráð kýs þrjá fulltrúa í miðstjórn og voru þau Ásta Stefánsdóttir, Árborg, Guðbergur Reynisson, Reykjanesbæ og Jarl Sigurgeirsson, Vestmannaeyjum kjörin til setu í miðstjórn næsta starfsár. Auk þeirra er formaður kjördæmisráðs sjálfkjörinn í miðstjórn.

Í dag hefur Sjálfstæðisflokkurinn þrjá þingmenn af tíu í Suðurkjördæmi. Það eru þeir Ásmundur Friðriksson, Páll Magnússon og Vilhjálmur Árnason sem allir hyggjast gefa kost á sér í komandi prófkjöri.