Vilja funda með heilbrigðisráðherra og Sambandi íslenskra sveitarfélaga

vegna reksturs dvalar- og hjúkrunarheimila á landsbyggðinni

26.Desember'20 | 11:38

Hraunbúðir. Ljósmynd/TMS

Málefni Hraunbúða voru rædd á síðasta fundi bæjarrráðs Vestmannaeyja. Íris Róbertsdóttir, bæjarstjóri fór yfir fundi sem átt hafa sér stað við Sjúkratryggingar Íslands um rekstur Hraunbúða og áforma um yfirfærslu dvalar- og hjúkrunarheimilisins í lok mars 2021.

Einnig fór bæjarstjóri yfir samskipti sín og fundi með bæjarstjórum þeirra sveitarfélaga sem ákveðið hafa að endurnýja ekki samninga um rekstur dvalar- og hjúkrunarheimila á landsbyggðinni, þ.e. bæjarstjórann á Akureyri, bæjarstjórann á Höfn í Hornafirði og bæjarstjórann í Fjarðabyggð.

Jafnframt var haldinn fundur með Sambandi íslenskra sveitarfélaga um stöðu mála. Í fundargerðinni kemur fram að bæjarstjórar sveitarfélaganna fjögurra hafi óskað eftir fundi með heilbrigðisráðherra og Sambandi íslenskra sveitarfélaga.