Bæjarskrifstofurnar í Íslandsbankahúsið?

26.Maí'20 | 07:22
islandsbanki_tms

Stefnt er að því að Vestmannaeyjabær kaupi húsnæði Íslandsbanka. Ljósmynd/TMS

Íris Róbertsdóttir, bæjarstjóri kynnti fyrir bæjarráði í gær drög að samkomulagi milli Vestmannaeyjabæjar og Íslandsbanka um kaup á húsnæði bankans við Kirkjuveg, sem hugsuð yrðu sem starfsaðstaða fyrir hluta af starfsemi bæjarskrifstofa Vestmannaeyja. 

Málið verður tekið til afgreiðslu á næsta bæjarstjórnarfundi sem haldinn verður þann 28. maí nk. Samkomulagið er gert með fyrirvara um samþykki bæjarstjórnar.

Gagnrýnir skort á upplýsingagjöf til bæjarfulltrúa

Í bókun frá Hildi Sólveigu Sigurðardóttur, fulltrúa D lista segir að hún gagnrýni skort á upplýsingagjöf til bæjarfulltrúa vegna yfirvofandi mögulegra kaupa og stefnubreytingar í húsnæðismálum sveitarfélagsins. Öllum bæjarfulltrúum Sjálfstæðisflokksins hefur ekki verið kynnt nýting á húsnæðinu, hver kostnaður við breytingar og endurbætur á húsnæðinu muni verða né framtíðarrekstrarkostnaður.

Nú þegar er búið að að verja fimm milljónum til hönnunar á húsnæði á þriðju hæð Fiskiðjunnar til að öll starfsemi bæjarskrifstofa Vestmannaeyjabæjar gæti sameinast undir einu þaki en slíkt felur í sér tækifæri til rekstrarhagræðingar, samþættingar og styttri boðleiða milli starfsfólks.

Ljóst er að húsnæði Íslandsbanka nægir ekki fyrir alla ofangreinda starfsemi en upplýst var á fundinum að áætlað er að fjölskyldu- og fræðslusvið flytji starfsemi sína í húsnæði Íslandsbanka en í dag standa yfir kostnaðarsamar framkvæmdir vegna breytinga á skrifstofuhúsnæði þeirra sviða í núverandi húsnæði á Rauðagerði. Slíkt er óábyrg meðferð almannafjármuna líkt og bæjarfulltrúar Sjálfstæðisflokksins hafa áður bent á. Vestmannaeyjabær á og rekur mikinn fjölda eigna sem er kostnaðarsamur í rekstri og viðhaldi. Mikið væri unnið með því að draga úr kostnaðarsömu eignarhaldi Vestmannaeyjabæjar á fjölda fasteigna í stað þess að auka það.

Aðgengi að húsnæðinu er gott og verður starfsmannarými aðlagað að þörfum starfseminnar

Í bókun frá Njáli Ragnarssyni og Jónu Sigríði Guðmundsdóttur, fulltrúum H og E lista segir að í umræðum í bæjarráði hafi komið fram að bæjarstjóri muni fyrir fund bæjarstjórnar nk. fimmtudag leggja fyrir minnisblað um þá valkosti sem eru um framtíðarskipulag húsnæðis stjórnsýslu Vestmannaeyjabæjar, m.a. að nýta 1. hæð húss Íslandsbanka og eldhúsaðstöðu á 2. hæðinni fyrir hluta af starfsemi bæjarskrifstofa sem og fræðslu- og fjölskyldusviðs Vestmannaeyjabæjar. Með því verður öll aðstaða starfsfólks og viðskiptavina til fyrirmyndar. Aðgengi að húsnæðinu er gott og verður starfsmannarými aðlagað að þörfum starfseminnar.

 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...

Má bjóða þér að auglýsa hér?

23.Júní'22

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.