Algjört hrun í útflutningi á ferskum fiski

18.Mars'20 | 18:33

Einhverjir eru farnir að huga að minnkandi sjósókn vegna ástandsins. Ljósmynd/TMS

„Ferskfiskmaðurinn er farinn,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, um stöðuna sem upp er komin hjá íslenskum sjávarútvegsfyrirtækjum, vegna COVID-19 faraldursins.

Hún segir að nánast enginn ferskur fiskur sé fluttur út þessa dagana, eftir að fjölmörgum veitingastöðum, hótelum og fiskborðum í verslunum bæði í Evrópu og Bandaríkjunum var lokað. Frá þessu er greint á fréttavef Ríkisútvarpsins.

Heiðrún Lind segir að hún hafi ekki heyrt um nein vandræði með flutningsleiðir, heldur hafi markaðurinn einfaldlega þurrkast út á örskömmum tíma. Hlutirnir hafi gerst mjög hratt og fiskkaupendur séu jafnvel hættir að svara í símann.

„Það er enginn til að kaupa ferskan fisk,“ segir Heiðrún Lind, en ferskur fiskur var fluttur út fyrir tæplega 80 milljarða í fyrra.

Allt viðtalið má lesa hér.