HSÍ frestar öllum leikjum ótímabundið

Ákvörðunin er tekin í kjölfar tilkynningu heilbrigðisráðherra í morgun um samkomubann sem tekur gildi á sunnudag.

Fram gat tryggt sér deildartitil kvenna í kvöld með sigri á Stjörnunni en Framkonur verða að bíða líkt og aðrir handboltaleikmenn landsins sem munu ekki spila næstu vikur, segir í frétt á ruv.is.

Tilkynning HSÍ í heild:

Eftir tilkynningu frá heilbrigðisráðherra í morgun um takmarkanir á samkomum vegna Covid-19 vírussins (samkomubanns) hefur stjórn HSÍ tekið þá ákvörðun að fresta öllum leikjum í mótum á vegum HSÍ ótímabundið frá og með kl.17.00 föstudaginn 13.mars.

HSÍ ásamt öðrum sérsamböndum fundaði með ÍSÍ í dag og var þessi ákvörðun tekin á stjórnarfundi í beinu framhaldi.

HSÍ mun fylgjast með framgangi samkomubanns stjórnvalda og bregðast við því eftir því sem þurfa þykir.