Að fólk hringi í 1700 - ekki mæta á heilsugæsluna

- Veikir einstaklingar eru sérstaklega beðnir um að mæta ekki á bráðamóttöku sjúkrahúsa eða á heilsugæslustöðvar nema að fengnum ráðleggingum í síma

4.Mars'20 | 15:13

Heilbrigðisstofnunin í Vestmannaeyjum. Ljósmynd/TMS

Heilbrigðisstofnunin í Vestmannaeyjum vill koma því á framfæri til bæjarbúa að um leið og grunur vaknar um að covid 19 veiran sé komin eða nálgist Vestmannaeyjar að fólk hringi í 1700 eða á heilsugæsluna (432-2500). Fólk er beðið um að mæta alls ekki upp á spítala sé grunur um smit.

Mikilvægt er að fólk fylgi ráðleggingum frá heilbrigðisstarfsfólki.

Einkenni kórónaveiru (COVID-19)

Einkenni líkjast helst inflúensusýkingu, hósti, hiti, bein- og vöðvaverkir og þreyta. COVID-19 getur einnig valdið alvarlegum veikindum með neðri öndunarfærasýkingu og lungnabólgu, sem koma oft fram sem öndunarerfiðleikar á 4.–8. degi veikinda.

Ef einstaklingar finna fyrir veikindum er þeim bent á að hringja í síma 1700 varðandi nánari upplýsingar og hvernig þeir eigi að nálgast heilbrigðiskerfið.

Veikir einstaklingar eru sérstaklega beðnir um að mæta ekki á bráðamóttöku sjúkrahúsa eða á heilsugæslustöðvar nema að fengnum ráðleggingum í síma.