Íris Róbertsdóttir skrifar:

Skrýtin skrif oddvita D-listans

1.Mars'20 | 14:28
iris_roberts

Íris Róbertsdóttir

Vel rekið og fjárhagslega sterkt bæjarfélag notar góða afkomu til að lækka álögur á bæjarbúa og/eða bæta þjónustuna við þá. 

Ekki er gengið á eignir til að fjármagna rekstur heldur eru árlegar tekjur látnar standa straum af árlegum útgjöldum. Nákvæmlega þetta hefur núverandi bæjarstjórnarmeirihluti gert.

Þetta kann einhverjum að þykja svo augljóst að það sé nánast barnalegt að tíunda það í grein; hvað þá að þurfa að gera það til að svara oddvita D-listans í bæjarstjórn sem skrifaði í vikunni sérkennilegan pistil með fyrirsögninni ''Vinstrið er við völd''.

Þar er m.a. að finna þá skrýtnu staðhæfingu að nú sé verið ''... að eyða þeim sjóðum sem Sjálfstæðisflokkurinn hefur verið í langan tíma að byggja upp''.

Og á facebooksíðu D-listans í Eyjum er svo bætt um betur með þessum samsetningi: ''Atkvæðakaup vinstri meirihlutans á kostnað uppsafnaðs sparnaðs hægri meirihlutans. Það er sárt að horfa á árangur hagræðingaraðgerða sem áttu að verða til heilla bæjarbúa notaðan á þennan hátt''.

Hvernig ber eiginlega að skilja þetta? Í fyrsta lagi er staðhæfingin auðvitað kolröng. Það hefur ekki verið gengið á neinar eignir eða sjóði bæjarins til að fjármagna rekstur hans.

Í öðru lagi mætti ætla af orðalaginu að það hafi verið hinn fallni ''hægri meirihluti'' sem hefði fyrir eiginn reikning önglað þessu fé saman en ekki bæjarbúar.

Í þriðja lagi virðist gæta þess misskilnings hjá D-lista fólkinu að bæjarsjóður sé einhverskonar sparibaukur. Í hann eigi að safna ávinningi af góðum rekstri í stað þess að láta bæjarbúa njóta hans með lægri álögum og/eða betri þjónustu, eins og gert er í dag. Hvort viðhorfið skyldi nú lýsa meiri vinstrimennsku, svo vísað sé til orða oddvitans?

Mistök leiðrétt

Og hvert var svo tilefni þessa kostulega málflutnings?

Jú, meirihluti bæjarstjórnar samþykkti að stofna aftur embætti hafnarstjóra til að leiðrétta þannig þau stjórnunarlegu mistök sem gerð voru árið 2010 þegar embættið var lagt niður.

Það kemur skýrt fram í minnisblaði sem starfshópur framkvæmda- og hafnarráðs skilaði af sér að bæta þurfi skipulag og umgjörð starfsemi hafnarinnar töluvert svo vel sé. Mikið álag á stjórnendur hafnarinnar og langar og óskýrar boðleiðir valda því að stjórnun hafnarinnar er ekki eins og best verður á kosið. Skýra þurfi ábyrgðarsvið betur og gegnir hafnarstjóri þar lykilhlutverki.

Og það er nákvæmlega þetta sem verið er að gera.

Enn ein röng staðhæfing

Og eins og ofangreint sé ekki nóg þá bætir oddviti D-listans við enn einni rangri staðhæfingu og sakar núverandi meirihluta um að ''...setja á ný fjárfrek stöðugildi sem hefur farið stöðugt fjölgandi á kjörtímabilinu''.

Stöðugildum hefur fjölgað um samtals 1 á kjörtímabilinu; aðeins eitt. Stofnuð var 50% staða fjölmenningarfulltrúa og 50% staða íþrótta-, æskulýðs- og tómstundafulltrúa. Hvorttveggja til að bæta þjónustuna við bæjarbúa.

Það á svo eftir að koma í ljós hvort endurskipulagningin á umhverfis- og framkvæmdasviði, m.a. með tilkomu hafnarstjóra, leiði af sér nettófjölgun stöðugilda eða tilfærslur og breytingar á starfshlutföllum.

Held áfram að vona

Ég hef um skeið vonað og hlakkað til að sá dagur rynni upp að minnihlutinn í bæjarstjórn kæmi aðeins upp úr skotgröfunum og tæki í staðinn upp málefnalega gagnrýni á meirihlutann. Það uppbyggilega samtal myndi síðan leiða fram þær niðurstöður sem væru hagfelldastar fyrir bæjarbúa. Við vorum jú öll kosin til að gæta hagsmuna þeirra. Við gætum svo auðvitað verið ósammála um ýmsa hluti en það væri þá eftir vitrænar rökræður.

Miðað við þann málflutning sem ég hef rakið hér að ofan þá hefur sú von heldur dvínað; en ég ætla samt að halda áfram að vona!

 

Íris Róbertsdóttir

bæjarstjóri

 

 

Mannlíf og saga - hlaðvarp

2.Mars'21

Nýtt hlaðvarp/podcast fer í loftið á fimmtudaginn 4. mars nk. Nýr þáttur kemur út á hverjum fimmtudegi og verður hlaðvarpið aðgengilegt á Eyjar.net ásamt helstu veitum svo sem Spotify og Youtube. Fylgstu með...

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Meiraprófsbílstjóri óskast til starfa

29.Apríl'21

Óska eftir meiraprófsbílstjóra í vinnu sem fyrst - tímabundin vinna til 1. september.  Kranapróf kostur. Upplýsingar í síma 6600250, Magnús.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.