Saga mikilla framfara í samgöngum á sjó

í Einarsstofu kl. 17.00 á morgun, fimmtudag

11.Desember'19 | 11:51

Herjólfur, hinn fyrsti. Ljósmyndir/Sigurgeir Jónasson

Sigurgeir Jónasson, ljósmyndari frá Skuld tók myndir þegar fyrsti Herjólfur lagðist nýr að bryggju kl. 14.00 laugardaginn 12. desember 1959. Þær verða sýndar ásamt fleiri myndum sem tengjast samgöngum á sjó í Einarsstofu kl. 17.00 á morgun, fimmtudag þegar sextíu ár verða frá komu skipsins.

Þarna verða líka myndir af Herjólfi tvö og þrjú og þeim nýjasta sem kom í sumar. Þær myndir tóku Sigurgeir og Viktor P. Jónsson en í sameiningu settu þeir saman sýninguna sem er mjög forvitnileg.

Fyrsti Herjólfur gekk daglega á milli Reykjavíkur og Vestmannaeyja og sigldi auk þess hálfsmánaðarlega til Hornafjarðar og á sumrin hin síðari ár til Þorlákshafnar einu sinni í viku. Bílar voru hífðir á dekk og var Herjólfur númer tvö fyrsta bílaferjan. Hann sigldi fyrst sex daga í viku til Þorlákshafnar en núna eru sjö ferðir í Landeyjahöfn þegar fært er þangað.

Þá mun Guðbjartur Ellert Jónsson, framkvæmdastjóri Herjólfs ohf. segja frá stöðu mála í dag.

Hinn 22. nóvember 1918 voru lög frá Alþingi um kaupstaðarréttindi fyrir Vestmannaeyjar staðfest af konungi. Lögin öðluðust gildi hinn 1. janúar 1919 og er sú dagsetning stofndagur Vestmannaeyjabæjar. Á þeim tíma bjuggu í Vestmannaeyjum ríflega tvö þúsund manns af rösklega 90 þúsund á landinu öllu. Fyrsti fundur bæjarstjórnar Vestmannaeyja fór fram 14. febrúar 1919.

Hér munu birtast greinar og umfjallanir allt afmælisárið um Vestmannaeyjabæ, afmælið og viðburði í tengslum við afmælið.