Erfitt ferðalag þingmanna!

29.September'14 | 15:18

Herjólfur

Enn eitt skiptið ná þingmenn suðurlands og ráðherrarnir tveir í þingliðinu ekki að heimsækja Vestmannaeyjar til að funda með bæjarfulltrúum. Þess er skammt að minnast að bæjarfulltrúar í Vestmannaeyjum urðu að fella niður fund þann 22. september með þingmönnum vegna anna á þeim bænum. Í þetta skipti hafði verið boðað til fundar í tengslum við kjördæmavikuna en þar sem Herjólfur siglir nú í Þorlákshöfn verður því ekki við komið.

Samkvæmt heimildum Eyjar.net ætluðu þingmennirnir að sigla úr Landeyjahöfn í kvöld og funda með heimamönnum í fyrramálið. Dagskráin gerir þeim hinsvegar ekki mögulegt að sigla frá Þorlákshöfn og því fellur fundurinn niður. Það er svo kaldhæðni örlaganna að á boðuðum fundum hefur fyrst og fremst staðið til að ræða samgöngur. Í Eyjum er nú helst hvíslað um að ef til vill hjálpi þetta þingmönnunum til að skilja við hverslags aðstæður Eyjamenn búa á meðan ætlast er til að of djúpristur Herjólfur sigli í of litla Landeyjarhöfn.