Herjólfur III til Færeyja

27.Maí'22 | 13:30

Gamli Herjólfur hefur verið bundinn við bryggju í Vestmannaeyjahöfn meira og minna síðustu ár. Ljósmynd/TMS

„Áætlað er að Herjólfur III leggi af stað til Færeyja í slipp á sunnudaginn e.h. Slippurinn heitir MEST og er í Skálar.”

Þetta segir G. Pétur Matthíasson, forstöðumaður samskiptadeildar Vegagerðarinnar í samtali við Eyjar.net. Um er að ræða reglubundna slipptöku.

Vegagerðin og Strandferðaskip í Færeyjum hafa átt í viðræðum síðustu mánuði um mögulega samnýtingu Herjólfs III. Fram kom í frétt Vegagerðarinnar í lok síðasta árs að grunnforsenda samninga sé að Herjólfur III sé aðgengilegur ef og þegar þörf reynist á og verði þannig áfram varaferja fyrir nýja Herjólf.

Aðspurður um hvað varði stöðuna á þessu máli segir G. Pétur að verið sé að leggja lokahönd á frágang á pappírum hvað varðar leigu á ferjunni til Færeyja.

Sjá einnig: Viðræður við Færeyinga um samnýtingu Herjólfs III