Vestmannaeyjabær:

Gera ráð fyrir hagnaði upp á 235 milljónir

3.Desember'21 | 13:58
ráðhúsið_11_21

Gert er ráð fyrir að 943,5 milljónir fari til framkvæmda á næsta ári. M.a verður haldið áfram með endurbætur á Ráðhúsi Vestmannaeyja. Ljósmynd/TMS

Bæjarstjórn Vestmannaeyja samþykkti í gær samhljóða fjárhagsáætlun fyrir árið 2022. Í áætluninnni er gert ráð fyrir jákvæðri rekstrarafkomu samstæðunnar að fjárhæð 235,8 m.kr. sem er um 6,6% af skatttekjum.

Áætlaðar tekjur á árinu 2022 eru 7.093 m.kr. og hækka um 437 m.kr. frá áætlun 2021. Tekjur eru varlega áætlaðar og ekki gert ráð fyrir að áætlaðar skatttekjur ársins 2022 verði hærri en raunverulegar skatttekjur þessa árs, segir í tilkynningu frá bæjaryfirvöldum.

Aukin áhersla lögð á að efla fræðslu- og uppeldismál

Rekstrarútgjöld eru áætluð 6.970 m.kr. á árinu 2022. Sem fyrr eru fræðslu- og uppeldismál stærsti einstaki málaflokkurinn í áætluninni, en aukin áhersla hefur verið á lögð á að efla fræðslu- og uppeldismál eins og undanfarin ár. Áfram verður gætt aðhalds í rekstri sveitarfélagsins og hagrætt þar sem því verður við komið, en jafnframt stuðla að því að þjónusta við bæjarbúa verði eins og best verður á kosið.

Álagningarprósenta útsvars verður óbreytt á næsta ári eða 14,46%. Fasteignaskattur íbúðarhúsnæðis lækkar úr 0,291% í 0,281%. Fasteignaskattur á fyrirtæki lækkar úr 1,55% í 1,45%. Um er að ræða lækkun álagningarprósentu fasteignaskatts á íbúðarhúsnæði þriðja árið í röð og atvinnuhúsnæði annað árið í röð.

Gera ráð fyrir tæpum milljarði til framkvæmda á næsta ári

Gert er ráð fyrir 943,5 m.kr. til framkvæmda á næsta ári. Þar af vega þyngst framkvæmdir við nýbyggingu við Hamarsskóla, endurbætur á Ráðhúsi Vestmannaeyja, fráveituframkvæmdir, búningsklefar í Íþróttamiðstöð, flóðlýsing og gervigras á Hásteinsvelli.

Meðal annarra áhersluverkefna má nefna áframhaldandi heilsueflingu eldri borgara (Janusarverkefnið), uppbyggingu tölvu- og upplýsingatæknimála hjá GRV, átak í ferðamálum, gerð gönguleiða og skipulagningu nýrrar íbúabyggðar við Löngulág.

Aukið fjármagn sett í rekstur leikskóla

Gjaldskrár fyrir ákveðna þjónustu Vestmannaeyjabæjar hækki ekki milli ára, þ.e.a.s. leikskóla, matarkostnaður fyrir börn í grunn- og leikskólum, dagvistargjöld, Frístund og matarkostnaður eldri borgara.

Aukið fjármagn sett í rekstur leikskóla til tryggja leikskólapláss barna frá 12  mánaða aldri.

Í áætluninni er gert ráð fyrir hækkun frístundastyrks um 15.000 kr. Verður frístundastyrkur að fjárhæð 50.000 kr. í boði fyrir hvert barn á aldrinum 2-18 ára.

Framkvæmdir fjármagnaðar með handbæru fé

Fjárhagsstaða Vestmannaeyjabæjar er sterk. Skuldir eru lágar og langt undir viðmiðunarmörkum sveitarstjórnarlaga. Það eru í raun fá eða nokkur sveitarfélög sem geta státað af álíka góðri skuldastöðu. Engar lántökur eru áætlaðar, enda allar framkvæmdir fjármagnaðar með handbæru fé, segir í tilkynningunni.

Fram kom í framsögu Írisar Róbertsdóttur, bæjarstjóra í gær að öllu samanlögðu væri ákaflega bjart framundan í rekstri Vestmannaeyjabæjar og raunar í öllu samfélaginu okkar.

„Við sjáum líka þessa bjartsýni raungerast út um allan bæ í fjárfestingum og uppbyggingu á vegum fyrirtækja og einstaklinga. Tækifærin eru mörg, meðal annars í frumkvöðla- og nýsköpunarstarfsemi og sókn í menntamálum og umhverfismálum.“

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Má bjóða þér að auglýsa hér?

23.Júní'22

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...