Samþykkt að lækka fasteignaskatta

- svo álögur á íbúa og fyrirtæki hækki ekki

13.September'21 | 07:25
hus_midbaer_bo

Vestmannaeyjabær. Ljósmynd/TMS

Bæjarráð Vestmannaeyja fundaði í síðustu viku vegna fjárhagsáætlunar næsta árs. Þar voru ræddar forsendur fjárhagsáætlunar fyrir árið 2022. 

Fram kemur í fundargerðinni að framundan séu vinnufundir í fagráðum og bæjarstjórn. Jafnframt er gert ráð fyrir að auglýsa og vinna úr umsóknum um "Viltu hafa áhrif?" næstu vikur og að framkvæmdastjórar skili áætlunum um rekstur og viðhald til fjármálastjóra. Gert er ráð fyrir að bæjarráð afgreiði fjárhagsáætlun til fyrri umræðu í bæjarstjórn undir lok októbermánaðar. Undirbúningur áætlunarinnar miðar vel.

Eftir á að taka ákvörðun um gjaldskrár er snúa að fjölskyldufólki sérstaklega

Í forsendum fjárhagsáætlunar er lagt upp með að útsvarsprósenta verði óbreytt á milli ára eða 14,46% og að framlög úr Jöfnunarsjóði sveitarfélaga verði í samræmi við áætlun sjóðsins, sem ætti að liggja fyrir áður en áætlunargerðinni lýkur. Í forsendum er hlutfall af álagningu fasteignaskatta á A flokk húsnæðis (íbúðarhúsnæði) 0,291%, á B flokk (opinberar stofnana) 1,32% og á C flokk (atvinnuhúsnæði) 1,45%.

Gerð er tillaga um að aðrar tekjur málaflokka, svo sem vegna gjaldskráa bæjarins, hækki um 2,5% í takt við spá um vísitölu neysluverðs á næsta ári. Hins vegar á eftir að taka ákvörðun um gjaldskrár er snúa að fjölskyldufólki sérstaklega, t.a.m. leikskólagjöld, skólamáltíðir og Frístund.

Stuðst verður við sérstaka launaáætlun við undirbúning fjárhagsáætlunarinnar, sem tekur mið af mannaflaþörf á stofnunum bæjarins og útreikningi á áhrifum kjarasamninga. Með því eykst nákvæmni við áætlun launa. Gert er ráð fyrir að aðrir rekstrarliðir hækki almennt um 2,5%.

Samþykkt samhljóða 

Meirihluti E og H lista lagði til að hlutfall fasteignaskatts á íbúðarhúsnæði lækki á milli ára og verði 0,281% á íbúðarhúsnæði (A flokki), 1,32% á opinberar stofnanir (B flokki) og 1,45% á annað húsnæði (C flokki), þ.m.t. atvinnuhúsnæði. Með þessu móti sé komið í veg fyrir að hækkun fasteignamats auki álögur Vestmannaeyjabæjar á íbúa og fyrirtæki.

Var tillaga meirihlutans samþykkt samhljóða.

Lagði til að fallið verði frá ákvörðun meirihluta H og E lista um fjölgun bæjarfulltrúa

Í bókun frá Hildi Sólveigu Sigurðardóttur, fulltrúa Sjálfstæðisflokksins segir að hún fagni og samþykki fyrirhugaðar lækkanir á fasteignaskatti líkt og fulltrúar Sjálfstæðisflokksins hafa áður lagt til á kjörtímabilinu. Undirrituð leggur áherslu á mikilvægi hagræðingar og ráðdeildar í rekstri og leggur því fram eftirfarandi tillögu:

Undirrituð leggur til að fallið verði frá ákvörðun meirihluta H og E lista um fjölgun bæjarfulltrúa í hagræðingarskyni en óhjákvæmilegt er að launakostnaður, stærsti einstaki útgjaldaliður sveitarfélagsins vaxi enn frekar á komandi árum vegna þess.

Tillagan var felld með tveimur atkvæðum E og H lista gegn einu atkvæði D lista

Ekki gert ráð fyrir hærri heildarkostnaði við fjölgun bæjarfulltrúa

Í bókun frá Njáli Ragnarssyni og Jónu Sigríði Guðmundsdóttur fulltrúum E og H lista segir að það sé ánægjulegt að fulltrúi Sjálfstæðisflokksins í bæjarráði samþykki tillöguna enda gríðarlega mikilvægt að gæta hófs í álögum sveitarfélagsins til þess að gera Vestmannaeyjabæ að aðlaðandi stað fyrir fólk og fyrirtæki.

Undirrituð geta ekki samþykkt tillöguna enda er ekki gert ráð fyrir hærri heildarkostnaði við fjölgun bæjarfulltrúa. Næsta bæjarstjórn ákveður sjálf laun kjörinna fulltrúa og getur þ.a.l. ákveðið að fara ekki umfram þær fjárheimildir sem lagt er til í fjárhagsáætlun sem eru þær sömu og eru fyrir sjö fulltrúa, segir í bókun meirihlutans.

Að reynt verði að komast hjá því að auka álögur á bæjarbúa eins og kostur er, án þess að þjónusta skerðist

Bæjarráð samþykkti svo samhljóða forsendur fjárhagsáætlunarinnar og þakkar upplýsingarnar. Bæjarráð leggur áherslu á að við gerð fjárhagsáætlunar verði reynt að komast hjá því að auka álögur á bæjarbúa eins og kostur er, án þess að þjónusta skerðist.

Gerir athugasemd við að ekki hafi verið gert ráð fyrir útgjaldaaukningu vegna þessarar ákvörðunar í forsendum fjárhagsáætlunar

Að endingu bókaði Hildur Sólveig Sigurðardóttir, fulltrúi Sjálfstæðisflokks. Þar segir að hún samþykki forsendurnar en minnir á að ákvörðun meirihlutans um fjölgun bæjarfulltrúa kemur til framkvæmda um mitt næsta ár.

„Ég geri því athugasemd við að ekki hafi verið gert ráð fyrir útgjaldaaukningu vegna þessarar ákvörðunar í forsendum fjárhagsáætlunar. Engin ákvörðun hefur verið tekin um lækkun launa bæjarfulltrúa, áætlanir sveitarfélagsins mega ekki taka mið af ákvörðunum sem hugsanlega verða teknar í framtíðinni heldur af raunstöðunni eins og hún er í dag, annað væri óábyrgt.” segir í bókun Hildar.
 

Mannlíf og saga - hlaðvarp

2.Mars'21

Nýtt hlaðvarp/podcast fer í loftið á fimmtudaginn 4. mars nk. Nýr þáttur kemur út á hverjum fimmtudegi og verður hlaðvarpið aðgengilegt á Eyjar.net ásamt helstu veitum svo sem Spotify og Youtube. Fylgstu með...

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).