Kveikt verður á kertum við Kirkjugarðshliðið

Í tilkynningu frá stjórn Eykyndils í Verstmannaeyjum segir að kveikt verði á kertum við Kirkjugarðshliðið kl. 19.00 sunnudaginn 15. nóvember til minningar um þá sem hafa látist hafa í umferðaslysum. Þeir sem vilja geta komið og kveikt á kertum. Munið að passa upp á tveggja metra regluna. 

Guðni Th. Jóhannesson, forseti Íslands, og Sigurður Ingi Jóhannsson, samgöngu- og sveitarstjórnarráðherra, senda kveðju af þessu tilefni í myndböndum þar sem minningardagurinn er sniðinn að aðstæðum í samfélaginu. Í stað rótgróinnar minningarstundar við þyrlupallinn við Landspítalann verður árvekniátak í samfélaginu um umferðaröryggi um helgina. Myndböndin má sjá neðar í þessari frétt.

Á vef Stjórnarráðsins segir að tilgangurinn með deginum sé að minnast þeirra sem látist hafa í umferðinni, leiða hugann að ábyrgð hvers og eins í umferðinni en ekki hvað síst að þakka þeim viðbragðsaðilum sem veita hjálp og björgun.

Minningarviðburðir verða haldnir um land allt og fjallað verður um mikilvæg málefni tengd umferðaröryggi í fjölmiðlum, myndböndum og umræðum á samfélagsmiðlum. Streymt verður frá þessum viðburðum í beinni vefútsendingu á Facebook.