Skýrslan einungis vegvísir að heildstæðri óháðri úttekt

23.Október'20 | 07:20
gardur_herjolfur_ny

Herjólfur IV siglir hér inn Landeyjahöfn í blíðu. Ljósmynd/TMS

Með fyrstu skrefum í átt að heildstæðri úttekt á Landeyjahöfn hefur tekist að ná utan um helstu gögn sem höfninni tengjast og skilgreina helstu þætti sem upp á vantar og þarf að ráða bót á í úttektarferlinu.

Enn fremur hefur tekist að skilgreina ferlið fram á við til mats á mögulegum leiðum til úrbóta á nýtni hafnarinnar. Það gefur fyrirheit um mögulega kosti að ferli loknu til grundvallar ákvarðanatöku um framtíðaráform fyrir samgöngubætur milli lands og Eyja.

Þetta segir í lokaorðum skýrslu Mannvits, Vatnaskila og Leo van Rijn Sediment (LVRS Consultancy) um Landeyjahöfn sem unnin var fyrir Samgönguráðuneytið. Skýrslan er nokkuð ítarleg og telur hún 86 síður. Grípum nú niður í helstu niðurstöður.

Í byrjun desember 2019 fól Alþingi samgöngu- og sveitarstjórnarráðherra að hefja óháða úttekt á Landeyjahöfn í samræmi við samgönguáætlun fyrir árin 2019-2033 og fimm ára samgönguáætlun fyrir árin 2019-2023. Lögð var áhersla á mikilvægi þess að flýta úttekt óháðra aðila á Landeyjahöfn þar sem ástandið í höfninni gæti ekki talist boðlegt íbúum Vestmannaeyja né öðrum sem treysta þurfa á greiðar samgöngur milli lands og Eyja. Við þingsmeðferð ályktunarinnar komu fram sjónarmið um að líta verði til allra þátta sem geta haft áhrif á nýtingu hafnarinnar við gerð úttektarinnar. 

Ráðleggingar fyrir mat á mögulegum endurbótum á höfninni

Helstu þætti sem takmarka siglingu ferjunnar ásamt reynslunni sem komin er af dýpkunaraðgerðum þarf að setja í samhengi við mat á setmyndun og öldufari nærri höfninni. Í skýrslunni er þetta gert að því marki sem unnt er nú til að fá fram innlegg í þær spurningar sem lagðar voru fram í þingsályktuninni. Sér í lagi má af þessu ráða að þörf er á endurbótum á höfninni til að ná markmiðum um stóraukna nýtingu hennar þar sem mótvægisaðgerðir hingað til hafa ekki dugað. Með þetta í huga má draga fram eins konar frummat á þeim álitamálum sem tilgreind eru í spurningum þingsályktunarinnar:

1. Er hægt að gera þær úrbætur á Landeyjahöfn að dýpkunarþörfin minnki verulega eða hverfi?

Setmyndun til þessa við Landeyjahöfn gefur vel til kynna hver setmyndun verður sem taka þarf tillit til við framtíðarrekstur hafnarinnar fyrir óbreytt dýptarviðmið. Til að minnka verulega dýpkunarþörf þarf að ákvarða mögulegt dýpkunarfyrirkomulag sem tekur tilliti til nýju ferjunnar og þeirrar reynslu sem fengist hefur á nýtingu hafnarinnar. Slíkt fyrirkomulag væri borið saman við dýpkunaraðgerðir hingað til svo meta megi hvort dýpkunarþörf sé líkleg til að minnka. Aðgerðir sem leiða til skjólmyndunar milli rifs og hafnarmynnis gagnvart háum öldum myndu bæta siglingarhæfi ferjunnar milli rifs og hafnar og eru líklegar til að styðja við dýpkunaraðgerðir. Mikilvægt er að greina slíkar aðgerðir frekar og leggja mat á virkni þeirra og hvort einhver vandkvæði kunna að vera líkleg vegna þeirra. Ólíklegt er að unnt sé að gera endurbætur á höfninni eins og hún er í dag þannig að dýpkunarþörf hverfi. Til þess að slíkt markmið náist er líklegra að endurbætur þurfi að fela í sér róttækar lausnir sem krefjast endurhönnunar hafnarinnar. Slíka lausn þyrfti að skilgreina vel og meta til samanburðar við aðrar lausnir til endurbóta á höfninni. Dæmi um slíka útfærslu væri að byggja nýja höfn utan við rifið sem tengd væri eldri höfn með brú.

2. Í hverju fælust slíkar úrbætur og hver er áætlaður kostnaður við þær?

Leiðin til að svara þessu hefur verið kortlögð í skýrslunni með vegvísi að heildstæðri óháðri úttekt á Landeyjahöfn. Þar eru lagðar fram ráðleggingar til að draga fram og meta mögulegar endurbætur á höfninni. Munu þar annars vegar vera lagðar til grundvallar aðgerðir sem leiða til skjólmyndunar utan hafnar og hins vegar lausnir sem krefjast endurhönnunar hafnarinnar. Samanburður endurbóta verður bæði gerður út frá tæknilegum sjónarmiðum og kostnaði.

3. Ef slíkar endurbætur þættu ekki gerlegar, af tæknilegum eða fjárhagslegum ástæðum, til hvers konar dýpkunaraðgerða þyrfti þá að grípa til að halda höfninni opinni allan ársins hring?

Of snemmt er að segja til um hvort endurbætur kunna að vera gerlegar. Vegvísirinn að heildstæðri óháðri úttekt á Landeyjahöfn gerir ráð fyrir bæði tæknilegu mati og kostnaðarmati á mögulegum endurbótum. Enn fremur er gerður samanburðar við grunntilfelli sem gerir ráð fyrir nýju ferjunni og nauðsynlegum dýpkunaraðgerðum, en engum beinum endurbótum á höfninni. Mikilvægt er hins vegar að hafa í huga að setmyndun er ekki eini þátturinn sem takmarkar siglingar ferjunnar. Öldufar hefur einnig veruleg áhrif. Þar af leiðandi mun slíkt grunntilfelli ekki varna því að höfninni verði lokað í einhverjum tilfellum. Því mun heildstæð úttekt að öllum líkindum ekki leiða í ljós að dýpkunaraðgerðir einar og sér muni leiða til heilsársopnunar hafnarinnar.

Vegvísir að heildstæðri óháðri úttekt

Við mat á mögulegum endurbótum á seinni stigum úttektar er gert ráð fyrir að beita þurfi aðferðafræði með samtvinnaðri notkun fræðilegs mats, einfaldari reikninga og reiknilíkangerðar.

Leiðin að heildstæðri óháðri úttekt á Landeyjahöfn í samræmi við skilgreiningu Alþingis hefur verið kortlögð, með eftirfarandi nauðsynlegum næstu meginskrefum:

  1. Úrbætur í upplýsingaöfluninni. Frekari gagnasöfnun og gagnagreining.
  2. Skilgreining á grunntilfelli fyrir framtíðarrekstur hafnarinnar án endurbóta.
  3. Ákvörðun á mögulegum endurbótum og mat á virkni þeirra.
  4. Samanburður á mögulegum endurbótum með hliðsjón af spurningum þingsályktunarinnar.

Nánari grein er gerð fyrir þessum meginskrefum í skýrslunni. Frekari gagnasöfnun og gagnagreining er útlistuð og greint er frá helstu þáttum sem snúa að skilgreiningu grunntilfellis fyrir framtíðarrekstur hafnarinnar án endurbóta. Enn fremur eru dæmi tekin um hugsanlegar útfærslur endurbóta sem þarf að meta með hliðsjón af virkni. Er þar bæði horft til aðgerða til skjólmyndunar og lausna sem krefjast endurhönnunar á höfninni. Lagður er grunnur að hvernig samanburður verður gerður á mögulegum endurbótum.

Skýrslan verður gerð opinber síðar í dag. Eyjar.net mun fjalla nánar um skýrsluna í dag.

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Tilboð á gistingu á Brú Guesthouse

21.Ágúst'20

Brú Guesthouse býður tilboð á gistingu á til áramóta. Gisting í smáhýsi fyrir 2.  9.900,- kr. nóttin. 2.000 kr fyrir auka gest. Húsin rúma 4 gesti. 
Stærra hús 12.900 kr. nóttin og 2.000 fyrir auka gest. Upplýsingar á Info@bruguesthouse eða í síma 659-4005.