Bæjarstjórn Vestmannaeyja:

Deilt um aðferðafræði við innheimtu skatta og gjalda

Fulltrúar minnihlutans lýsa yfir undrun yfir því að það hugnist ekki bæjarfulltrúum meirihlutans að skoða hvort svigrúm reynist til útsvarslækkunar - meirihlutinn segir að nær væri að lækka útsvar í efnahagslegri uppsveiflu

17.Október'20 | 10:07
IMG_2787

Frá fundi bæjarstjórnar. Ljósmynd/TMS

Fjárhagsáætlun næsta árs var til umræðu og staðfestingar á fundi bæjarstjórnar Vestmannaeyja á miðvikudaginn síðastliðinn. Bókað var á víxl af minni- og merihluta um áætlunina.

Fulltrúar Sjálfstæðisflokksins leggja áherslu á að við fjárhagsáætlunarvinnuna verði leitað leiða til að draga úr álögum á bæjarbúa til hagsbóta fyrir heimilin.

Útsvarstekjur sveitarfélagsins hafa hækkað undanfarin ár og þrátt fyrir fyrirsjáanlegar efnahagslegar þrengingar og mikla óvissu er mikilvægt að hagræða þar sem kostur er og halda úti öflugri þjónustu með sem minnstum tilkostnaði, segir í bókun minnihlutans.

Telja það ekki ábyrga fjármálastjórnun að lækka útsvar á þessum tímapunkti

Í bókun frá fulltrúum E og H lista segir að töluverð óvissa ríki um efnahagshorfur næstu misserin, hvort heldur er af beinum og óbeinum áhrifum Covid-19 eða af þróun aflabragða t.d. í loðnu. Í ljósi þeirrar þróunar sem verið hefur á þessu ári, þar sem þrengt hefur að fjárhagsstöðu bæjarins, og óvissunni framundan, er ekki ábyrg fjármálastjórnun að lækka útsvar á þessum tímapunkti.

Nær væri að lækka útsvar í efnahagslegri uppsveiflu og þegar útlit er fyrir myndarlega rekstrarafkomu bæjarsjóðs. Tækifæri voru næg til lækkunar útsvars þegar Sjálfstæðisflokkurinn var í meirihluta á árum 2006-2018. Rekstur sveitarfélagsins gekk vel, þáverandi meirihlutinn nýtti sér þó aðeins einu sinni á 12 árum að lækka útsvar þrátt fyrir jákvæða rekstrarafkomu á bilinu tæpar 300 millj. til 1.000 millj. nær öll þessi ár. Sú útsvarslækkun var fyrir kosningaárið 2014 en íbúar nutu þess ekki lengi því aftur hækkaði Sjálfstæðisflokkurinn útsvarið árið 2016.

Ef létta á undir með íbúum færi betur á því að koma til móts við barnafjölskyldur, eldri borgara, þá tekjulægri og þá sem eru að koma undir sig fótunum. Það er gert með því að lækka þjónustugjöld fyrir t.d. leikskóla, máltíðir og frístund sem nýtist íbúum betur á þessum tímum. Þetta er meirhluti E- og H-lista tilbúinn að skoða við gerð fjárhagsáætlunar sé svigrúm til, segir í bókun meirihlutans.

Málið var samþykkt með sjö samhljóða atkvæðum.

Vilja að allir bæjarbúar njóti góðs af en ekki eingöngu þeir sem nýta sér niðurgreidda þjónustu sveitarfélagsins

Hildur Sólveig Sigurðardóttir oddviti Sjálfstæðisflokksins gerði grein fyrir atkvæði sínu með bókun og tók Eyþór Harðarson bæjarfulltrúi D lista undir bókunina.

Í bókuninni segir að undirrituð lýsi yfir undrun yfir því að það hugnist ekki bæjarfulltrúum meirihlutans að skoða hvort svigrúm reynist til útsvarslækkunar.

Enginn er betur til þess fallin að ráðstafa þeim peningum sem fólk aflar en einmitt þeir sem vinna sjálfir fyrir þeim. Það mætti útleggjast sem ákveðið lýðræðismál að hafa álögur á bæjarbúa sem lægstar til að þeir sjálfir hafi ákvörðunarréttinn til að ráðstafa sínum peningum frekar en að framselja þann rétt til fárra kjörinna fulltrúa.

Einmitt á krepputímum, þegar sveitarfélagið hefur möguleika á að létta undir með bæjarbúum ættum við í það minnsta að skoða það hvort það sé möguleiki og hvað við getum mögulega gert til þess þannig að allir bæjarbúar njóti góðs af en ekki eingöngu þeir sem nýta sér niðurgreidda þjónustu sveitarfélagsins.

Því hvet ég ykkur áfram til að skoða það af fullri alvöru hvort við getum ekki skoðað áhrif þess að lækka útsvar í sveitarfélaginu, með það að markmiði að létta undir skattgreiðendum á erfiðum tímum, að gera Vestmannaeyjabæ að enn eftirsóknarverðari búsetukosti og síðast en ekki síst til að leyfa bæjarbúum sjálfum að ákveða í hvað þeim finnst skynsamlegt að verja sínum krónum í.
 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...

Má bjóða þér að auglýsa hér?

23.Júní'22

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.