Alfreð Alfreðsson skrifar:

Sláturtíð

30.September'20 | 11:18
gomul_rolla

Ljósmynd/aðsend

Það er komið haust og sláturtíðin komin á fullan skrið. Mér skilst að hjá Norðlenska á Húsavík slátri þeir um 2000 stykkjum á dag.

Sláturhús ISAVIA slátraði þremur störfum í eyjum í vikunni. Sveinbjörn Indriðason heitir framkvæmdastjóri sláturhússins. Hann er með rúmar þrjár milljónir í laun á mánuði. Ekki veitir af, blóðugur upp fyrir haus í drápinu. Sjálfur sláturhússtjórinn er nú ekki af verri endanum, bóndi og dýralæknir úr Flóanum, minna má það nú ekki vera.

Frá því að flugfélagið Ernir hætti flugi hingað hefur ekki heyrst múkk frá dýralækninum, væntanlega nóg að gera við að moka flórinn, bæði heima við og á stjórnarheimilinu. Þetta gengur samt vonandi bærilega hjá ráðherranum og bóndanum, enda ráðherralaun bara ágæt og kúabúskapurinn niðurgreiddur af almenningi. Skilst að bændastéttin fái einhverja 13 milljarða á ári til að halda uppi atvinnu í sveitum svo maður tali nú ekki um fæðuöryggið. Æjá, bændur landsins fá sem sagt 3000 krónur á mánuði frá hverjum lifandi einstaklingi á landinu til þess að geta stundað sína atvinnu.

Af góðsemi sinni ætlar Sigurður Ingi að niðurgreiða flugsæti Vestmannaeyinga um 6000 krónur fyrir hvern þann sem ætlar að fljúga allt að þrisvar sinnum á ári. Það gera 36 þúsund krónur á ári enda niðurgreitt í báðar áttir.

Í viðtali við eyjar.net í síðasta mánuði sagði Hörður Guðmundsson forstjóri flugfélagsins Arna að þetta litla félag hefði greitt sláturhúsi ISAVIA yfir 100 milljónir. Er fólk hissa á því að innanlandsflugið sé að gefa upp öndina?

Í fyrra flugu 11.200 manns milli eyja og lands. Nú skulum við setja upp dæmi. Gefum okkur að 9600 flugsæti seljist með skosku leiðinni. Það gera niðurgreiðslur upp á 57.600.000 krónur. Bætum við launum framkvæmdastjóra ISAVIA, 36 milljónir á ári. Samanlagt gerir þetta 93.600 þúsund.

Í viðtali við Fréttablaðið 9. september sl. sagði Hörður Guðmundsson að opinber gjöld á hvert flug til eyja væru 8.389 krónur. Eins og áður sagði flugu 11.200 manns milli lands og eyja í fyrra. Skatttekjur af þeim er samtals 93.956.800 krónur. Við greiðum sem sagt með þessu reikningsdæmi niðurgreiðsluna til okkar sjálfra og laun framkvæmdastjóra sláturhússins.

Ég keyrði austur á Hornafjörð í síðustu viku. Í suðursveit er fjósið Flatey, stærsta og fullkomnasta fjós landsins byggt af miklum stórhug. Mér skilst að full kúað beri það um 700 kýr. Er kannski kominn tími til þess að við krefjumst meiri hagræðingar í landbúnaði og þar með lækkun niðurgreiðslna? Þar væri kannski hægt að finna nokkrar krónur til þess að niðurgreiða flugið.

Að lokum. Munið slagorð Mjólkursamsölunnar, mjólk er góð.

Má bjóða þér að auglýsa hér?

23.Júní'22

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Mannlíf og saga - hlaðvarp

2.Mars'21

Fylgstu með hlaðvarpinu Mannlíf og saga. Nýr þáttur kemur út á hverjum fimmtudegi og er hlaðvarpið aðgengilegt hér á Eyjar.net og einnig á helstu veitum, svo sem Spotify. Sjá nánar hér...