Markaðsátak skilaði góðum árangri

21.Ágúst'20 | 07:32

Markaðsátak sem sett var á laggirnar í vor skilaði góðum árangri. Ljósmynd/TMS

Fulltrúar ferðaþjónustunnar í Vestmannaeyjum komu á fund bæjarráðs í vikunni til þess að greina frá stöðu ferðaþjónustunnar og sér í lagi stöðu ferðaþjónustufyrirtækja þegar langt er liðið á sumarið.

Þá var farið yfir framtíðarsýn Ferðamálasamtaka Vestmannaeyja gagnvart starfsemi Markaðsstofu Suðurlands og hvernig horfurnar eru framundan.

Ferðaþjónustan ræddi m.a. nauðsyn þess að halda áfram því góða markaðsátaki sem sett var á laggirnar í vor og skilaði góðum árangri. Meðal áherslna í áframhaldandi markaðsátaki er að skilgreina erlenda markhópa og markaðssetja Vestmannaeyjar gagnvart erlendum ferðamönnum.

Í afgreiðslu ráðsins segir að bæjarráð þakki fulltrúum ferðaþjónustunnar fyrir upplýsingarnar og felur bæjarstjóra og framkvæmdastjóra stjórnsýslu- og fjármálasviðs að funda reglulega með ferðaþjónustunni um stöðu mála.