Á von á að meiri kraftur færist í makrílveiðar þegar nær dregur mánaðamótum

17.Júní'20 | 10:43
kap_vsv

Kap VE 4 í heimahöfn. Ljósmynd/TMS

Kap VE 4, skip Vinnslustöðvarinnar í Vestmannaeyjum, varð fyrst íslenskra skipa til að hefja makrílveiðar á þessu ári. 

Skipið landaði um 200 tonnum síðastliðinn föstudag og í byrjun vikunnar 250 tonnum af makríl og einhverju af síld. Jón Atli Gunnarsson skipstjóri kveðst í samtali við Fiskifréttir ætla að leyfa sér að vera bjartsýnn á veiðarnar á þessu ári.

„Þetta er svona með fyrra fallinu sem við byrjum á makríl miðað við undanfarin ár. Við fórum reyndar fyrir sjómannadag árið 2011. Þá partrolluðum við með gamla Ísleifi, Kap og Sighvati Bjarnasyni. Við byrjuðum ekki fyrr en um mánaðamótin júní/júlí í fyrra þótt við hefðum viljað byrja fyrr. Á þessum tíma var orkupakki 3 í lás inni á Alþingi og ekki hægt að afgreiða makrílfrumvarpið fyrr en 28. júní. Það er umhugsunarefni hvort ekki hafi farið ansi mikil verðmæti fram hjá okkur vegna þessa,“ segir Jón Atli.

Menn eru að skima og skoða miðin

Kap hóf makrílveiðar fyrir réttri viku. Kastað var um miðnótt um 30 sjómílur suðaustur af Vestmannaeyjum og dregið í um tvo og hálfan tíma. Um 70 tonn fengust af óblönduðum makríl. Kastað var að nýju á svipuðum slóðum og fékkst þá síldarblandaður afli. Jón Atli segir mikið um dreifða síld við Suðurlandið. Menn reyni að forðast hana eins og hægt er. Hann segir að þó veiðin sé ekki mikil einmitt núna henti það vel að stutt er í land. Því lengra sem haldið er frá heimahöfn því meiri þarf veiðin að vera.

„Makríllinn sem við fengum þarna var mjög stór og góður. Meðalvigtin var 470 grömm og við vorum að sjá allt upp í 600 gramma makríl. Við hefðum líka viljað sjá smærri makríl í aflanum til þess að fullvissa okkur um að nýliðunin sé í lagi.“

Jón Atli segir kannski ekki mikið að marka veiðarnar nú þar sem svo skammt er liðið á vertíðina. Nú hafa bæst við fleiri skip á þessar veiðar, m.a. Huginn VE, Víkingur AK og Venus NK. Menn eru að skima og skoða miðin. Víkingur leitaði til að mynda austur eftir öllu landgrunninu og langt út í haf. Þetta sé því að fara í gang en engin kraftveiði sé hafin.

„Ég á von á því að það færist meiri kraftur í þetta þegar nær dregur mánaðamótum. Þá verða líka væntanlega komin fleiri skip á þessar veiðar.“

Fiskifréttir.is greindu frá. Allt viðtalið við Jón Atla má lesa hér.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Lumar þú á grein?

11.Janúar'19

Endilega sendu okkur hana á eyjar@eyjar.net. Eyjar.net - fyrir alla. 

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Tilboð á gistingu á Brú Guesthouse

21.Ágúst'20

Brú Guesthouse býður tilboð á gistingu á til áramóta. Gisting í smáhýsi fyrir 2.  9.900,- kr. nóttin. 2.000 kr fyrir auka gest. Húsin rúma 4 gesti. 
Stærra hús 12.900 kr. nóttin og 2.000 fyrir auka gest. Upplýsingar á Info@bruguesthouse eða í síma 659-4005.