Sóttvarnir í Vinnslustöðinni ganga vonum framar

11.Apríl'20 | 19:45
IMG_5854

Engin kórónaveirusmit hafa greinst í landvinnslu VSV. Ljósmynd/TMS

Engin kórónaveirusmit hafa greinst í landvinnslu VSV, skipum, erlendum sölufyrirtækjum eða í Grupeixe saltfiskfyrirtæki VSV í Portúgal. 

Tveir sjómenn greindust með smit en annar var í fríi og hinn í sóttkví og aðrir í áhöfn voru því ekki í smithættu. Smit greindist í dótturfélagi VSV, Hafnareyri, og þar fóru því nokkrir starfsmenn í sóttkví. Frá þessu er greint á fréttavef Vinnslustöðvarinnar.

Skimað eftir kórónaveiru hjá áhöfnum

Starfsfólk HSU í Vestmannaeyjum, í samstarfi við Íslenska erfðagreiningu, skimaði eftir kórónaveiru hjá áhöfnum Breka VE og Ísleifs VE á miðvikudaginn var. Öll sýni reyndust neikvæð. Ísleifur heldur til kolmunnaveiða strax eftir páska og í lok veiðiferðar verður skipt um áhöfn og skimað eftir veiru áður en lagt verður upp til veiða á nýja leik.

Íslensk erfðagreining skimaði eftir veiru hjá áhöfnum Brynjólfs VE og Drangavíkur VE í gær, föstudaginn langa, og snýr sér að áhöfn Kap II á öðrum degi páska.

Hættan engan veginn liðin hjá

„Sóttvarnaráðstafanir Vinnslustöðvarinnar hafa skilað miklum árangri. Við erum afar þakklát öllu starfsfólkinu til sjós og lands fyrir að hafa lagst á árar með okkur, tileinkað sér og virt takmarkanir og reglur á vinnustöðum og utan vinnu.

Þetta gengur vonum framar á 300 manna vinnustað, ég hef fjöldann hreinu því við dreifðum 300 súkkulaðieggjum á línuna fyrir páskana! Fólk fer einfaldlega varlega og verður að halda vöku sinni áfram. Hættan er engan veginn liðin hjá og við störfum í samfélagi þar sem faraldurinn hefur dreift sér hratt á skömmum tíma.

Þetta tekur á en samheldnin í fyrirtækinu er mikil og aðdáunarverð. Hér er unnið á fullum krafti í fiski í dag (laugardag 11. apríl) og undanfarna daga hefur hvert framleiðslumetið verið slegið í saltfiskvinnslu Vinnslustöðvarinnar. Það er reyndar alveg makalaust í miðjum ótrúlega skæðum veirufaraldri.“

Þurftu að endurskoða hópaskiptinguna

Lilja Björg Arngrímsdóttir, sviðsstjóri mannauðs- og lögfræðisviðs, var útnefnd „generáll“ í baráttunni við kórónaveiruna á vettvangi VSV. Hún ræddi upphaflega við sóttvarnalækni Suðurlands til undirbúnings viðbragðsáætlun í fyrirtækinu og þegar fyrsta smit greindist í Eyjum var áætlunin virkjuð.

„Við skiptum fólki í hópa í landvinnslunni  og mæltum fyrir um að hópaskiptingin gilti jafnt á vinnusvæðum sem í skiptirýmum, á kaffistofum og snyrtingum. Kröfur um hreinlæti og þrif voru hertar stórlega alls staðar og handrið, hurðarhúnar, salerni, kaffiborð og fleiri snertifletir sótthreinsaðir reglulega.

Aðgerðastjórn í Vestmannaeyjum setti strangari takmarkanir en giltu á fastalandinu til að bregðast við skjótri útbreiðslu faraldursins hér. Áður en samkomutakmarkanir voru færðar úr 100 manns niður í 20 víðast annars staðar voru þær færðar niður í 10 manns í Eyjum. Við þurftum að endurskoða hópaskiptinguna í samræmi við þetta til að fækka þeim sem yrðu í hættu ef einhver greindist með smit.

Öruggara umhverfi gagnvart veirusmiti í vinnunni en annars staðar

Við létum vita af því að starfsmenn, sem teldu sig vera í sérstakri áhættu af einhverjum ástæðum, gætu verið heima og haldið launum á meðan. Um 20 manns gáfu sig fram en helmingur þeirra er kominn til starfa á ný. Það sýnir að starfsfólkið hefur fulla trú á og treystir því að sóttvarnarráðstafanir okkar séu öflugar og árangursríkar.

Ég leyfi mér að segja að fólk sé í öruggara umhverfi gagnvart veirusmiti hér í vinnunni en annars staðar. Við bendum fólki á að passa sig utan vinnu, umgangast einungis nánustu fjölskyldu og gæta sig vel úti í búð.

Áhafnir skipanna fengu leiðbeiningar og sérstaka sóttvarnakassa um borð. Einn skipverji okkar veiktist á sjó og skipstjórinn fékk leiðbeiningar frá Landhelgisgæslunni og aðgerðastjórn í Eyjum hvað bæri að gera. Viðbrögðin um borð voru fullkomlega rétt. Í ljós kom að skipverjinn var með venjulega flensu en verklagið okkar virkaði óaðfinnanlega.“ segir Lilja Björg.

Vilt þú ná til Eyjamanna?

17.Ágúst'19

Þá er Eyjar.net rétti staðurinn til þess. Sendu okkur línu á auglysingar@eyjar.net - og við aðstoðum þig að finna góða lausn fyrir þig og þitt fyrirtæki.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).