Samheldni og samstaða okkar sterkasta vopn

Í sameiginlegri bókun allra bæjarfulltrúa segir að heimsfaraldur COVID-19 muni á næstunni hafa mikil áhrif á mannlíf og atvinnulíf bæjarins. Því er afar brýnt að bæjarbúar fari að tilmælum almannavarna, landlæknis og sóttvarnarlæknis til að hægja á útbreiðslu faraldursins.

Bæjarstjórn vill koma á framfæri þakklæti til allra þeirra sem standa í framlínunni við að takast á við hina aðsteðjandi ógn og hvetur bæjarbúa til þess að snúa bökum saman og takast í sameiningu á við ástandið. Í gegnum tíðina hafa Vestmannaeyingar sýnt að þegar mest liggur við er samheldni og samstaða okkar sterkasta vopn. Með slíkt að leiðarljósi munu íbúar í Vestmannaeyjum standa af sér storminn.

VIÐ ERUM ÖLL ALMANNAVARNIR.