Ófært í Landeyjahöfn í 1,8 metra ölduhæð - þetta er ástæðan

11.Febrúar'20 | 13:01

Herjólfur sigldi til Þorlákshafnar í morgun. Ljósmynd/TMS

Það voru margir sem undruðust að Herjólfur hafi ekki siglt í Landeyjahöfn í morgun. Ölduhæð á dufli innan við 2 metrar og norðan átt, sem er hagstæðust til siglinga í Landeyjahöfn.

Gísli Valur Gíslason, skipstjóri á Herjólfi segir að í morgun og síðustu daga hafi aðstæður í og við Landeyjahöfn verið ansi sérstakar.

Duflið í skjóli við Vestmannaeyjar, en höfnin ekki

„Í morgun þegar ákvörðun var tekin um hvert skyldi sigla sýndi öldudufl við Landeyjar 1,9m en það er ekki nóg. Öldu og straum radar í Landeyjahöfn sem gefur okkur öldhæð í innsiglingargatinu og straum við höfnina sýndi 3,8m ölduhæð.” segir skipstjóri Herjólfs.

Gísli Valur segir að aldan í morgun og síðustu daga hafi verið að koma að Eyjum úr suð-vestri sem gerir það að verkum að duflið er í skjóli við Vestmannaeyjar, en höfnin ekki.

„Eins og sést vel á myndinni að þá er sýnd ölduhæð á dufli og raunveruleg staða við höfnina alls ekki sú sama.”

Dýpið ennþá gott í höfninni

Aðspurður segir Gísli Valur það algengt að ekki sé algert samrými á milli sýndrar ölduhæðar á dufli og ölduhæð af radar. „Þetta sjáum við t.d. mjög oft í hreinni austan átt þegar duflið sýnir háa öldu en síðan getur verið alveg slétt við höfnina.”

Hann segir dýpið ennþá gott í höfninni miðað við síðustu mælingar.

Enn má búast við að hægt verði að sigla síðdegis í dag til Landeyjahafnar?

Það er erfitt að segja. Eins og staðan er núna er ennþá ófært, þó vissulega séu aðstæður að skána.