Vestmannaeyjar í gegnum ljósopið mitt

- sýning Óskars Péturs í Einarsstofu kl. 13.00 á laugardaginn

13.September'19 | 05:40

Ljósmynd/Óskar Pétur Friðriksson

Hugmynd Stefáns Jónassonar sem situr í afmælisnefnd Vestmannaeyjabæjar að fá ljósmyndara í bænum til að sýna Eyjamönnum og gestum það sem þeir og þær hafa verið að gera í gegnum árin fékk heldur betur byr undir vængi.

Niðurstaðan er röð ljósmyndasýninga í Einarsstofu næstu þrettán laugardaga klukkan 13.00 til 14.30. Alls eru þátttakendur um 40.

Óskar Pétur Friðriksson verður fyrstur í röðinni og sýnir hann myndir sem hann hefur tekið við höfnina. Óskar Pétur var til sjós og vann í tvo áratugi við smíðar og þá oftast fyrir neðan Strandveg. Myndirnar sýna þróun hafnarinnar, breytingar á flotanum og vinnubrögð sem í dag heyra sögunni til. Þarna er líka fólk sem setti svip á bæjarlífið. Það er því sannarlega ástæða til að skella sér í Einarsstofu á laugardaginn og kíkja aðeins til baka.

Hinn 22. nóvember 1918 voru lög frá Alþingi um kaupstaðarréttindi fyrir Vestmannaeyjar staðfest af konungi. Lögin öðluðust gildi hinn 1. janúar 1919 og er sú dagsetning stofndagur Vestmannaeyjabæjar. Á þeim tíma bjuggu í Vestmannaeyjum ríflega tvö þúsund manns af rösklega 90 þúsund á landinu öllu. Fyrsti fundur bæjarstjórnar Vestmannaeyja fór fram 14. febrúar 1919.

Hér munu birtast greinar og umfjallanir allt afmælisárið um Vestmannaeyjabæ, afmælið og viðburði í tengslum við afmælið.