Botnlaus vinna en besta fríið

- komu hingað til Eyja gagngert til að aðstoða við pysjubjörgun

6.September'19 | 13:38
IMG_5344

Sue Pazinko, Deb Baum og Jill Spring-Delucia gáfu sér tíma fyrir myndatöku. Ljósmyndir/TMS

Pysjuævintýrið er nú að ná hámarki í Vestmannaeyjum. Á fimmtudaginn féll heimsmetið þegar á sjötta hundrað pysjur voru vigtaðar. Þær eru nú orðnar á fjórða þúsund og má búast við miklum fjölda pysja um helgina.

Pysjuævintýrið er nú að ná hámarki í Vestmannaeyjum. Á fimmtudaginn féll heimsmetið þegar á sjötta hundrað pysjur voru vigtaðar. Þær eru nú orðnar á fjórða þúsund og má búsat við miklum fjölda pysja um helgina.

Mikið álag er á starfsfólk Pysjueftirlitsins. Það var því kærkomið fyrir starfsfólkið að fá óvæntan liðsauka frá Bandaríkjunum í byrjun vikunnar. Þá komu þrír sjálfboðaliðar gagngert frá Ameríku til að aðstoða við þetta ævintýri.

Fyrstu kynnin voru að gæða sér á lunda

Forsaga málsins er sú að ein þeirra, Deb Baum var stödd hér á landi í fyrra. Þá fór hún á veitingastað og bragðaði lunda í fyrsta sinn. Síðar í ferðinni hitti hún Karen Lynn Velas sem sagði henni frá lundanum og lundabyggðinni í Vestmannaeyjum.

Karen er núna þriðja árið í röð hjá Pysjueftirlitinu og er að sjá um að hreinsa þær lundapysjur sem hafa lent í höfninni og verið bjargað þaðan. Hún var með námskeið fyrir starfsfólk Sæheima í fyrra í hreinsun sjófugla.

Deb tók þá ákvörðun í kjölfar þess að Karen sagði henni frá þessu ævintýri að hingað skildi hún koma í ár til að aðstoða. Vinkonur hennar þær Sue Pazinko og Jill Spring-Delucia ákváðu að slá til og koma með Deb.

Besta frí sem þær hafa upplifað

Ritstjóri Eyjar.net hitti á þær stöllur í Pysjueftirlitinu í gær. Mikið var að gera hjá þeim, en þær gáfu sér smá tíma til að segja frá þessu sérstaka „fríi“ sínu.

„Við komum hingað á mánudaginn og verðum til laugardags. Þetta er búið að vera algjört ævintýri.“ segir Sue. Hún segir þetta besta frí sem þær hafi upplifað. Þrátt fyrir að vera dauðþreytt í lok dags í fríi sínu, þá segir hún að það gleymist fljótt því þetta sé svo gefandi.

Sue bætir við að þær séu ákveðnar í að koma aftur að ári og eiga þær von á að fleiri bætist í hópinn. Þegar ritstjóri var í heimsókn sinni var Deb að fæða nokkrar pysjur. „Við gefum þeim loðnu. Stundum þarf að koma þeim á bragðið með þetta. En allt hefst þetta“ segir Deb þegar hún reynir að koma fæðunni niður.

Frekar sleppum við farangrinum okkar, en að sleppa sápunni

Margrét Lilja Magnúsdóttir stjórnar Pysjueftirlitinu. Hún segir að þær amerísku séu algjör himnasending fyrir eftirlitið. „Þær eru fullar áhuga og eru á fullu með okkur frá morgni til kvölds. Það skiptir miklu máli að hafa nóg af fólki, nú þegar fjöldi pysja skiptir hundruðum á degi hverjum.“

Þá vill Margrét Lilja taka fram að Karen sé einnig algjör himnasending fyrir pysjueftirlitið. ,,Það er algjörlega ómetnalegt starf sem hún hefur innt af hendi hér fyrir okkur.”

Þær bandarísku komu ekki tómhentar til landsins. Þær tóku með fullt af Dawn sápu. En hún er notuð til að hreinsa þær pysjur sem lenda í höfninni. Sú sápa er ekki fáanleg hér á landi og eru velunnarar Pysjueftirlitsins í Bandaríkjunum sem passa uppá að senda sápuna hingað. „Ég sagði við vinkonur mínar að þetta yrðum við að taka með. Frekar myndum við sleppa því að taka með farangurinn okkar, en að sleppa sápunni“ sagði Deb brosandi.

IMG_5326

Deb fæðir hér pysju.

IMG_5336

Jill og Deb.

IMG_5338

Sue Pazinko

IMG_5333

Pysjan sporðrennir hér loðnu.

IMG_5345

Hreinsun undirbúin.

Eyjar.net mælir með Skálakoti

19.Júní'20

Skammt austur af Seljalandsfossi leynist frábær hótelgisting og margvísleg afþreying. Sjón er sögu ríkari. Skálakot - þegar gera á vel við sig.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.