Að duga eða drepast

Bjarni hefur marga fjöruna sopið, jafnvel í orðsins fyllstu merkingu, þegar hann synti til lands við Ingólfshöfða til að hitta konu sína í Öræfum.

Hann var sjómaður, vélstjóri og skipstjóri í tíu ár, verkamaður, tækjastjóri og verkstjóri í fiskvinnslu í önnur tíu og svo stofnandi Eyjaflugs og flugmaður í tíu ár. Síðan framkvæmdastjóri hjá Heimaey kertaverksmiðju og stofnandi ÚV FM104.

Ekki hefur Bjarni alltaf farið troðnar slóðir, en í bók hans kemur líka fram saga venjulegs fólks í sjávarþorpi og saga þjóðarinnar á umbrotatímum á sjó og í landi. Hann minnist á sænsku bátana sem lögðust á hliðina og sukku og lýsir eldgosi á Heimaey og flugrekstri í óðaverðbólgu. 

Einnig segir hann hreinskilnislega frá fráfalli sona, sigrum og ósigrum, mönnum og málefnum. Mikið og margt merkilegra mynda er í bókinni.