Páll Marvin Jónsson og Auður Ósk Vilhjálmsdóttir skrifa:

Einræðisleg skipun stjórnar Herjólfs ohf.

30.Júní'19 | 17:46
IMG_1726

Nýr Herjólfur. Ljósmynd/TMS

Baráttan um bættar samgöngur hefur verið og mun líklega áfram verða eitt af megin verkefnum bæjastjórnar Vestmannaeyja enda eitt stærsta hagsmunamál Eyjamanna. 

Ferðaþjónustan, sjávarútvegurinn, verslun og þjónusta og íbúar eiga allt undir því að samgöngur séu í lagi allt árið um kring. Þó svo að stórum áföngum hafi verið náð þá er þessari baráttu hvergi lokið. Það er því gríðarlega mikilvægt að bæjarstjórn standi saman og berjist fyrir lausnum um að efla og bæta samgöngur bæði í lofti og á sjó.
 
Við sem þetta skrifum sátum saman í bæjarstjórn Vestmannaeyja á síðasta kjörtímabili, bæði í meiri- og minnihluta. Oft tókumst við á um ýmis málefni enda fylgir það ólíkum flokkum að nálgast ekki alltaf viðfangsefni frá sama sjónarhóli, en um eitt vorum við ávallt sammála um,  mikilvægi þess að vinna þétt saman er við kom samgöngumálum Vestmannaeyja. Það er því miður að lesa og heyra um það í hvaða farvegi þessi mál eru nú.
 
Af fréttum að dæma frá aðalfundi Herjólfs ohf. þar sem meirihluti bæjarstjórnar skipti út öllum sínum þremur stjórnarmeðlimum  var eitt og annað augljóslega ekki eins og best verður á kosið. Ekki var fundað í bæjarráði eða bæjarstjórn í aðdraganda aðalfundar félagsins sem er að fullu í eigu Vestmannaeyjabæjar. En það hefði verið eðlilegt að bæjarstjóri fengi umboð bæjarstjórnar fyrir aðalfundinn. Ný stjórn var heldur ekki samþykkt opinberlega af bæjarstjórn líkt og gert var í upphafi þegar undirrituð tóku þátt í að skipa fyrstu stjórn Herjólfs ohf. á síðasta kjörtímabili (1534. fundi bæjarstjórnar). Samkvæmt upplýsingum sem bárust af fundinum  voru engar tillögur um stjórnarlaun, ráðstöfun hagnaðar eða taps. Tillögur um aðra starfsemi félagsins sem er að fullu í eigu Vestmannaeyjabæjar og fjallar um stærsta hagsmunamál sveitarfélagsins, samgöngur á sjó, voru heldur ekki ræddar fyrir þennan aðalfund, hvorki í bæjarráði eða bæjarstjórn. Hvorki stjórnarmenn sjálfir né fulltrúar minnihlutans voru upplýstir af meirihlutanum um hvaða aðila ætti að skipa áfram í stjórn Herjólfs ohf. Samkvæmt samþykktum félagsins þarf að tilkynna nöfn nýrra stjórnarmanna með fimm daga fyrirvara en svo virðist sem nöfnum nýrra stjórnarmanna hafi verið hvíslað í eyra fundarstjóra aðalfundarins á fundinum sjálfum. Þeir stjórnarmenn sem kastað var úr stjórn höfðu heldur ekki fengið neina tilkynningu um að það ætti að víkja þeim frá störfum fyrr en að brottrekstrinum þeirra kom á fundinum sjálfum. Okkur skilst að bæjarstjóri sé eini bæjarfulltrúinn sem hafi málfrelsi á fundinum og því hafi enginn getað gert athugasemdir við þessi atriði á fundinum.

Hvað stendur í vegi fyrir að kanna lögmætið?

Þessir starfshættir geta ekki verið taldir til opinna, gagnsærra eða lýðræðislegra vinnubragða. Slík framganga, við fólk sem hefur sinnt öflugu starfi fyrir okkur Vestmannaeyinga og bætt þjónustu aðal samgönguæðarinnar svo um nemur eins og flestir Vestmannaeyingar hafa fundið fyrir á undanförnum mánuðum, teljum við afar einkennilega og hreinlega dónalega. Þessir starfshættir eru einnig víðsfjarri þeirri samvinnu og samstarfi sem fulltrúar meirihlutans hafa sjálfir talað fyrir. Það á að vera hlutverk allra bæjarfulltrúa að tryggja að farið sé að lögum við stjórnsýslu sveitarfélagsins og eru það því veruleg vonbrigði að meirihluti bæjarstjórnar neiti að boða til nýs aðalfundar og neiti jafnframt að fá Fyrirtækjaskrá RSK til að kanna lögmæti aðalfundarins.

Samgöngur við Vestmanneyjar eiga ekki að snúast um meiri- og minnihluta eða hagsmunagæslu fyrir ákveðna hópa heldur þarf bæjarstjórn að vera samstíga og vinna að lausnum í samgöngumálum Eyjamönnum til heilla.


Páll Marvin Jónsson formaður Sjálfstæðisfélags Vestmannaeyja og fyrrverandi bæjarfulltrúi Sjálfstæðisflokksins
Auður Ósk Vilhjálmsdóttir fyrrverandi bæjarfulltrúi Eyjalistans

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.