Vestmannaeyjar - 100 ára kaupstaðarafmæli

13.Febrúar'19 | 05:07

Þann 1. janúar sl. voru hundrað ár frá því að Vestmannaeyjar fengu kaupstaðarréttindi og verður þess minnst með ýmsum hætti út afmælisárið. Fyrr í þessari viku var opnuð sýning í Einarsstofu þar sem saga Eyjanna er skoðuð með augum grunnskólabarna.

Sérstakur hátíðarfundur í bæjarstjórn Vestmannaeyja verður fimmtudaginn, 14. febrúar nk. kl. 18:00 til 19:30, þegar 100 ár eru frá fyrsta bæjarstjórnarfundinum. Fundurinn verður í bíósal Kviku.

Ýmsir viðburðir tengdir afmælinu verða svo allt árið, en aðalhátíðin verður 5. júlí og tengd árlegri hátíð þegar goslokanna 1973 er minnst.

Á föstudaginn, 15. febrúar nk., verður bæjarstjórnarfundur unga fólksins í samstarfi við Grunnskóla Vestmannaeyja. Fundurinn verður í bíósal Kviku og munu nemendur elstu bekkinga skólans efna til bæjarstjórnarfundar á sviðinu.

Á sunnudaginn, 17. febrúar verður opið málþing í bíósal Kviku; Nútíð, fortíð og framtíð Vestmannaeyja,  tækifæri og ógnanir.  Íris Róbertsdóttir, bæjarstjóri setur málþingið en frummælendur eru dr. Ágúst Einarsson, prófessor og fyrrverandi rektor Háskólans á Bifröst sem talar um samspil atvinnulífs og menningar, Bjarnheiður Hallsdóttir, formaður Samtaka ferðaþjónustunnar talar um tækifærin sem liggja í ferðaþjónustunni, dr. Hólmfríður Sveinsdóttir, frumkvöðull og stofnandi Protis ehf. á Sauðárkróki ræðir mikilvægi vísinda og nýsköpunar í sjávarútvegi, Ásgeir Jónsson, adjunkt við Háskólann í Reykjavík og umsjónarmaður Haftengdrar nýsköpunar segir frá nýsköpun og menntun í Bláa hagkerfinu og Tryggvi Hjaltason, senior Strategist hjá CCP og formaður Hugverkaráðs spyr Hvernig átt þú að tryggja að Vestmananeyjar sigri framtíðina?

Málþingsstjóri er Sara Sjöfn Grettisdóttir, ritstjóri Eyjafrétta.

 

Helstu dagskrárliðir framundan:

12.-19. febrúar:

Sýning á myndlist nemenda við Grunnskóla Vestmannaeyja um 100 ára sögu Vestmannaeyjabæjar. Sýningin verður haldin í Safnahúsinu og opnar kl. 16:00.  

14. febrúar 2019

Opinn hátíðarfundur í bæjarstjórn kl. 18-19:30. Fundurinn fer fram á sviðinu í aðalsal Kviku. Hátíðarsamþykktir. Boðið verður upp á kaffiveitingar að loknum fundi.  Annáll og 200 ljósmyndir þar sem stiklað er á stóru úr 100 ára sögu bæjarfélagsins og atburðum sem tengjast þróun byggðar í Eyjum.

15. febrúar 2019

Bæjarstjórnarfundur unga fólksins. Í samstarfi við Grunnskóla Vestmannaeyja munu nemendur elstu bekkinga skólans efna til bæjarstjórarfundar á sviðinu í aðalsal Kviku. Skipulag fundarins verður með sama hætti og á hefðbundinum bæjarstjórnarfundi. Unga fólkið mun leggja fram tillögur, bókanir eða áskoranir til bæjarstjórnar. Fundurinn er kl. 12:00-13:30. Boðið verði upp á veitingar (pítsu eða samlokur) að loknum fundi.

17. febrúar 2019

Málþing um Vestmannaeyjar í 100 ár: tækifæri og ógnanir. Horft verður til baka og til framtíðar. Fyrirlesarar: Dr. Ágúst Einarsson, Bjarnheiður Hallsdóttir, dr. Hólmfríður Sveinsdóttir, Ásgeir Jónsson og Tryggvi Hjaltason.

 

Apríl 2019

Kvikmyndahátíð á vegum bæjarfélagsins í Eyjabíó. Sýndar verða kvikmyndir, heimildarmyndir og myndbrot sem tengjast  Vestmannaeyjum.

2. til 3. júlí 2019

Úgáfudagur og dreifing afmælisrits í tilefni 100 ára afmælisins. Stærð afmælisrits verður 100 bls.  sem fer í aldreifingu innanbæjar.  Upplag  rúmlega 2000 eintök. Í ritinu verða meðal efnis, ávörp,  viðtöl, 100 ára annáll með ljósmyndum sem tengjast atburðum, þar sem stiklað er á stóru í sögu Vestmannaeyjabæjar, íbúaþróun, atvinnulífs, menningar ofl. auk umfjöllunar um bæjarstjórn í og starfsemi bæjarstofnana. Sérstök fjögurra manna ritnefnd hefur verið mynduð af fulltrúum afmælisnefndar bæjarins og Eyjasýnar hf,  en útgáfan er samstarfsverkefni og hefur verið gengið frá samkomulagi um kostnaðarskiptingu.  

5. júlí 2019   (föstudagur í goslokahelgi)

100 ára hátíðardagskrá á Stakkagerðistúni. – Stuttar hátíðarræður, tónlist ofl., barnadagskrá á Stakkó. Unnið í samráði við nýskipaða Goslokanefnd bæjarfélagsins.

Kynning á framkvæmdum innanhúss og gjörbreyttu hlutverki Ráðhússins að loknum áfangaskiptum  framkvæmdum.   

Móttaka bæjarstjórnar seinni parts dags í Eldheimum fyrir boðsgesti. Forseti Íslands, forsætisráðherra, ofl. ráðherrar, alþingismenn Suðurkjördæmis, núverandi og fyrrverandi bæjarfulltrúar, bæjarstjórar og nokkrir embættismenn Vestmannaeyjabæjar ásamt mökum.

Stórtónleikar í Eimskipshöll klukkan 18.00 og 21.00.

 

Október 2019

Kvikmyndahátið á vegum bæjarfélagsins í Eyjabíó. Sýndar verða kvikmyndir, heimildarmyndir og myndbrot sem tengjast  Vestmannaeyjum.

2. til 3. nóvember 2019

Safnahelgin í Eyjum. Um er að ræða lok 100 ára afmælisársins.  Árlegur viðburður.

 

Sagan:

Þann 22. nóvember árið 1918 staðfesti konungur lög frá Alþingi um kaupstaðarréttindi fyrir Vestmannaeyjar, sem öðluðust gildi 1. janúar 1919. Sá dagur telst vera stofndagur Vestmannaeyjabæjar.

Það hafa  skipst á skin og skúrir í langri sögu sögu byggðar í Vestmannaeyjum. Gríðarleg áföll af völdum Tyrkjaránsins 1627, mannskæðra sjóslysa, mikils ungbarnadauða, brottflutnings til Vesturheims og loks eldgossins á Heimaey 1973 höfðu hvert um sig afgerandi áhrif á þróun byggðar og mannlífs í Eyjum.  Íbúafjöldinn frá 1600-1900 var yfirleitt 300-500 manns. 

Saga Vestmannaeyja og þróun fiskveiða og fiskverkunar verður ekki sundurskilin. Vélbátaöldin sem hófst í Eyjum 1906 olli atvinnubyltingu og íbúafjöldinn þrefaldaðist á 15-20 árum og var um 2000 manns þegar Vestmannaeyjar fengu kaupstaðarréttindi 1919.  Þróunin hélt áfram, en heimskreppan sem hófst 1930 hafði mikil áhrif á samfélagið í Eyjum í heilan áratug.  Eftir það fjölgaði íbúum á ný og í árslok 1972 var íbúafjöldinn kominn í 5300 manns.

Eldgosið á Heimaey 1973 og afleiðingar þess höfðu gríðarleg og viðvarandi áhrif á þróun byggðar í Eyjum. Að gosi loknu, sumarið 1973 hófst mikið uppbyggingarstarf enda hafði  þriðjungur byggðarinnar, íbúðarhús og atvinnufyrirtæki farið undir hraun og gjall. Endurreisn byggðar, atvinnu- og mannlífs voru risavaxin verkefni sem tókst að framkvæma að miklu leyti á nokkrum árum með viðtækri samstöðu íbúanna, virkri  aðstoð stjórnvalda og góðri aðstoð ýmissa aðila innanlands og utan. Sumt verður aldrei bætt, en bæjarbúar lærðu að aðlaga sig að gjörbreyttu umhverfi. Talið er að liðlega 3600 manns hafi flutt heim á ný að loknu eldgosi, en nýir íbúar bættust í hópinn á næstu árum og áratugum.

 

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).