Fyrirkomulag á veitingu afsláttar af fasteignaskatti tekjulítilla elli- og örorkulífeyrisþega:

Málinu lokið af hálfu ráðuneytisins

5.Febrúar'19 | 14:31
kirkjuveg

Vestmannaeyjabær. Ljósmynd/TMS

Vestmannaeyjabæ barst bréf samgöngu- og sveitarstjórnarráðuneytisins 23. janúar sl, þar sem vísað er til útskýringa Vestmannaeyjabæjar á því fyrirkomulagi sem verður á veitingu afsláttar af fasteignaskatti tekjulítilla elli- og örorkulífeyrisþega í sveitarfélaginu. 

Telur ráðuneytið að ekki sé tilefni til frekari umfjöllunar um stjórnsýslu Vestmannaeyjabæjar að þessu leyti og málinu sé lokið af hálfu ráðuneytisins. Um þetta var fjallað á fundi bæjarráðs Vestmannaeyja í dag.

Ekki verða gerðar athugasemdir við töluverða hækkun á viðmiðunartekjum

Bæjarráð lýsir ánægju með viðbrögð samgöngu- og sveitarstjórnarráðuneytisins við þeim breytingum sem bæjaryfirvöld hafa gert á fyrirkomulagi afsláttarkjara til handa elli- og örorkulífeyrisþegum af fasteignaskatti. Með því staðfestir ráðuneytið að þar sem fallið hefur verið frá þeirri almennu niðurfellingu fasteignaskatts á íbúðarhúsnæði í eigu íbúa 70 ára og eldri sem viðgekkst áður, verði engar athugasemdir gerðar og málinu því lokið af þess hálfu. Það þýðir jafnframt að ekki verða gerðar athugasemdir við töluverða hækkun á viðmiðunartekjum elli- og örorkulífeyrisþega sem var ein meginbreytingin á fyrirkomulagi afsláttarins og leiðir til þess að mun fleiri elli- og örorkulífeyrisþegar njóta afsláttarkjaranna á þeim forsendum. 

Koma í veg fyrir meint lögbrot með öðru lögbroti

Í bókun minnihlutans segir að fulltrúi Sjálfstæðisflokksins í bæjarráði lýsi yfir miklum vonbrigðum með vinnubrögð E- og H lista í þessu máli og harmar að stjórnsýslu Vestmannaeyjabæjar eru nú svo illa komið að lög og almennar vinnureglur eru brotnar. 

Svarbréf var sent til ráðuneytisins án allrar umræðu í bæjarráði og bæjarstjórn, líkt og eðlilegt hefði verið miðað við þessa miklu stefnubreytingu, í því svarbréfi var fallið frá þeirri stefnu að fella niður fasteignaskatt á 70 ára og eldri. 

Í bréfi ráðuneytisins sem hér er til umfjöllunar kemur síðan fram að leita þurfi upplýsinga til annars ráðuneytis til að fá upplýsingar um hvort að það samrýmist ákvæðum laga um meðhöndlun úrgangs að veita afslátt af sorpeyðingargjöldum. Það er hreinlega vandræðalegt fyrir stjórnendur Vestmannaeyjabæjar að auka álögur á eldri borgara vegna ásakana eins ráðuneytis um lögbrot en gera það á svo óvandaðan hátt að sú leið sem farin er kalli nú á skoðun hjá öðru ráðuneyti á því hvort að um lögbrot sé að ræða á nýjum reglum sem H- og E- listi lögðu til. 

Fulltrúar Sjálfstæðisflokksins hafa áður bent á að nýjar reglur um afslátt af sorpeyðingargjöldum gætu brotið í bága við lög, og beinir ráðuneytið því til bæjarins að láta annað ráðuneyti skoða hvort að svo sé. Erfitt er að átta sig á á hvaða vegferð E- og H- listi eru með þetta mál, þegar það á að koma í veg fyrir meint lögbrot með öðru lögbroti. 

Minnt er á að vandræðagangur E- og H lista og óvönduð stjórnsýsla þeirra gengisfellir Vestmannaeyjabæ, segir í bókun Trausta Hjaltasonar, fulltrúa Sjálfstæðisflokksins í bæjarráði.

Mörg dæmi eru til um afslátt af þjónustugjöldum fyrir öryrkja- og eldri borgara

Meirihluti bæjarráðs lagði fram eftirfarandi bókun: Ákvörðun um flatan 85% afslátt af sorpeyðingargjöldum og lóðaleigugjaldi til handa öllum þeim sem náð hafa ellilífeyrisaldri 67 ára og eldri er að mati meirihlutans innan lagaheimilda. 

Ekki er að sjá að lög um meðhöndlun úrgangs og lög um hollustuhætti og mengunarvarnir, hvað varðar sorpeyðingargjöld, takmarki rétt sveitarfélaga til að veita elli- og örorkulífeyrisþegum afslátt af sorpeyðingargjöldum. Hins vegar er í lögum um tekjustofna sveitarfélaga skýrt kveðið á um hvernig slík afsláttarkjör takmarkast við tekjulága elli- og örorkulífeyrisþega. 

Ef ekki er kveðið á um sérstaka útfærslu afsláttar í lögum og svo framarlega að jafnræðis og meðalhófs sé gætt, þ.e. að i) stjórnvaldsákvörðunin sé til þess fallin að ná því markmiði sem stefnt er að, ii) sem minnsta röskum á hagsmunum borgarans fylgir ákvörðuninni og iii) gætt er hófs við beitingu úrræðisins, hlýtur umrædd ákvörðun að teljast innan heimilda stjórnsýslulaga. Það er mat meirihluta bæjarráðs að með tillögunni sé gætt að öllum þessum þáttum í lagalegu tilliti. 

Markmiðið um að stuðla að því að eldri borgarar geti búið lengur í eigin húsnæði og draga úr þörfinni fyrir önnur kostnaðarfrek húsnæðisúrræði fyrr en nauðsynlegt er á lífsævinni, eins og dvalar- og hjúkrunarrými, er skýrt og tillagan til þess fallin að það markmið náist með því að veita eldri borgurum afslátt af sorpeyðingargjöldum og lóðarleigu. Lítil röskun er á hagsmunum borgarans þar sem áfram verður létt undir fjárhagslega með ellilífeyrisþegum, en alla jafna verða eldri borgarar fyrir töluverðri launaskerðinga við töku ellilífeyris. Þar að auki er algengt að eldri borgarar búi einir í húsnæði eftir fráfall maka. Þá má færa rök fyrir því að losun sorps séu jafnan minni hjá ellilífeyrisþegum þar sem færri búa í heimili. 

Mörg dæmi eru til um afslátt af þjónustugjöldum fyrir öryrkja- og eldri borgara og má þar nefna afslátt í sundlaugar og af almenningssamgöngum. 
Ekki er verið að mismuna ellilífeyrisþegum á nokkrun hátt með tillögunni og jafnræðis gætt með því að allir íbúar 67 ára og eldri njóti sömu kjara, rétt eins og þeir ferðalangar Strætó og sundlaugagestir flestra sundlauga á landinu sem náð hafa ellilífeyrisaldri. Gert er ráð fyrir að allir íbúar fái umrædd afsláttarkjör þegar ellilífeyrisaldri er náð. 

Ákvörðun um afslátt af sorphirðugjöldum og lóðarleigu til handa ellilífeyrisþegum er ekki íþyngjandi fyrir aðra íbúa Vestmannaeyjabæjar þar sem ekki stendur til að hækka gjöldin hjá öðrum íbúum bæjarins vegna þessarar ákvörðunar. Munu sorphirðu- og lóðarleigugjöldin taka breytingum eftir þróun vísitölu næsta árs eins og undanfarin ár. Þess má að auki geta að frá árunum 2010 til 2018 hefur Vestmannaeyjabær greitt um 174 milljónir með sorphirðu, segir í bókun frá þeim Jónu Sigríði Guðmundsdóttur og Njáli Ragnarssyni. 

Þessu tengt: Afslátturinn nýtist nú töluvert fleiri fasteignaeigendum

Samþykkt að gera stjórnsýslulega úttekt á niðurfellingu fasteignaskatts til handa eldri borgurum frá því að fyrst var hafið að veita afslátt

Fulltrúi Sjálfstæðisflokksins lagði til að endurskoðanda sveitarfélagsins verði falið að leggja mat á þá stjórnsýslu sem viðhöfð hefur verið í þessu máli og kanna hvort hún sé í samræmi við góðar vinnureglur og hefðir við stjórn sveitarfélaga. Þar verði sérstaklega lagt mat á réttmæti þess að senda svarbréf til ráðuneytisins án allrar umræðu í bæjarráði og bæjarstjórn. Þá skal einnig metið hvort og þá með hvaða hætti rannsóknarreglu stjórnsýslulaga var fylgt við undirbúning þessa máls, en í henni fellst að stjórnvald eins og bæjarstjórn og bæjarráð skuli sjá til þess að mál sé nægjanlega upplýst áður en ákvörðun er tekin í því. 

Tillagan var felld með tveimur atkvæðum H og E lista gegn einu atkvæði D lista. 

Í kjölfarið kom tillaga frá meirihluta ráðsins þar sem segir að bæjarráð leggi til að endurskoðendum sveitarfélagsins verði falið að gera stjórnsýslulega úttekt á niðurfellingu fasteignaskatts til handa eldri borgurum frá því að fyrst var hafið að veita afslátt. Lagt verði mat á þá stjórnsýslu sem viðhöfð hefur verið frá því að ákveðið var að veita afsláttinn fyrst og öll samskipti við stjórnvöld eftir að það hófst. 

Tillaga meirihlutans var samþykkt með tveimur atkvæðum E og H lista gegn einu atkvæði D lista.

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).