Spurði ráðherra út í botndælubúnað í Landeyjahöfn

30.Nóvember'18 | 06:35
IMG_2368

Herjólfur siglir hér á milli garðana í Landeyjahöfn. Ljósmynd/TMS

Birgir Þórarinsson, þingmaður Miðflokksins spurði samgönguráðherra á dögunum út í botndælubúnað í Landeyjahöfn. Fyrirspurnin var í umræðum um fjárlög á Alþingi.

Í fyrirspurn Birgis segir að í fjárlagafrumvarpinu sé gert ráð fyrir fjárveitingu upp á 730 milljónir í botndælubúnað í Landeyjahöfn.

„Sá búnaður er þannig úr garði gerður að kranar eru beggja megin við innsiglinguna og þeir eiga að moka upp sandi sem berst fyrir innsiglinguna. Kranarnir ná hins vegar ekki upp á land þannig að sandinum er ekki mokað upp á land heldur er hann settur aftur í sjóinn. Það eru því mjög skiptar skoðanir um það hvort þessi búnaður kemur yfir höfuð til með að gagnast nokkuð.

Það sem ég vildi ræða hér við ráðherra er það hvenær hann sjái fyrir sér að þessi búnaður verði tekinn í notkun og hver rekstrarkostnaður hans sé áætlaður á ári.

Í upphafi þessa árs höfnuðu Ríkiskaup öllum tilboðum sem bárust í fastan dælubúnað við Landeyjahöfn. Spurningin er þá þessi: Kemur þessi fjárveiting til með að duga? Við komum svo aftur að þessu: Er tryggt að þessi dælubúnaður leysi það erfiða og kostnaðarsama mál sem sandburðurinn er fyrir innsiglinguna?

Ráðherra hefur verið þeirrar skoðunar, ef ég man rétt, að þriðji aðili taki út vandamálið sem þarna hefur verið og komi með tillögu til úrbóta. Þá er fróðlegt að fá að vita hvort ráðherra hafi beitt sér í þá veru í málinu og þá sérstaklega þegar ákvörðun um að kaupa botndælubúnaðinn var tekin.

Það væri líka gott að fá skoðun ráðherrans á þessum búnaði eins og ég sagði áðan, það eru mjög skiptar skoðanir um hvort hann gagnist en hann kostar mikla peninga.”

Menn hafa verið að þróa þetta í mjög langan tíma

Samgöngu- og sveitarstjórnarráðherra, Sigurður Ingi Jóhannsson sagði að hann væri ekki sérfræðingur í tæknilausnum þeim sem þarna hafa verið kynntar til sögunnar.

„Ég get þar af leiðandi ekki sagt til um það hvernig þetta á að virka og hvort þetta muni virka. En ég get vitnað til sérfræðinganna sem hafa hannað búnaðinn og verið að þróa hann. Við þekkjum það, bæði ég og þingmaðurinn, að sandhafnir víða um heim taka tíma. Við þekkjum það líka hér á Íslandi að þær hafa tekið tíma í þróun áður en þær verða nægilega vel þekktar. Landeyjahöfn hefur svo sannarlega ekki farið varhluta af því að fá sinn sand; reyndar líka náttúruhamfarir á borð við Eyjafjallagos og mikinn sandburð í kjölfar þess. Auðvitað vænta þeir sem um málið hafa vélað og hannað búnaðinn, sérfræðingarnir, þess að hann muni virka, annars væru menn ekki að fara þessa leið.

Varðandi þá spurningu hvort ráðherra hafi beitt sér sérstaklega í málinu hefur þessi ákvörðun verið mjög langan tíma á leiðinni; löngu áður en ráðherra settist í ráðherrastól. Þessi hönnun hefur tekið miklu lengri tíma. Menn hafa verið að þróa þetta í mjög langan tíma. Eins og kom fram hjá þingmanninum stóð til að bjóða þetta út og var gert, en ekki komu nægilega góð tilboð, þannig að þetta hefur verið tilbúið lengi. Fjárveitingin hefur líka verið tilbúin í þetta verkefni og auðvitað vonumst við öll eftir því að í þróun Landeyjahafnar, þar á meðal í þessum búnaði, nýtist þeir til þess að gera höfnina öruggari og betri svo hægt sé að sigla oftar þangað inn.

Ég get því miður ekki svarað þingmanninum betur hvað þetta varðar. Ég hef ekki tæknilega þekkingu á þessu sviði.” sagði Sigurður Ingi.

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Ég vil gerast félagsmaður í Krabbavörn

17.September'19

Hver félagsmaður skiptir félagið miklu máli. Ef þið hafið áhuga á að gerast félagsmenn þá endilega fyllið út eyðublaðið (smelltu hér). Krabbavörn er góðgerðarfélag sem styður við og styrkir þá félagsmenn sem greinast með krabbamein og eiga lögheimili í Vestmannaeyjum. Ár hvert leita u.þ.b. 10 nýir einstaklingar til félagsins eftir styrkjum og um 25 einstaklingar fá einhverskonar fjárstuðning frá félaginu á hverju ári. Árgjaldið er aðeins kr. 2500,-

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).