Rétt skal vera rétt

Tvær rangfærslur í einni bókun

Í umfjöllun Eyjar.net var það einkum tvennt sem að bent var á að ekki væri rétt í bókun meirihlutans um málið. Hið fyrra var að tjaldsvæðið væri búið að vera á þessum stað í 5 ár. Rétt er að tjaldsvæðið hefur verið notað í 9 ár. Um það þarf ekki að deila, þó svo að formaðurinn vilji frekar tala um 5 ár. 

Seinni rangfærslan í bókun meirihlutans er að ákvörðunin hafi ekki farið formlega inn í ráðið og því engin gögn til um ákvörðunina. Á það var bent í umfjöllun Eyjar.net að þetta var tekið fyrir í umhverfis og skipulagsráði árið 2010, á fundi nr. 121 og afstöðumynd fylgdi með.

Leituðu ekki nógu langt aftur í tímann

Eðlilega skil ég þetta þegar að um nýgræðinga í pólitík er að ræða, sem að þurfa tilsögn innan stjórnsýslunnar. Í þessu tilfelli leituðu fulltrúar meirihlutans bara ekki nógu langt aftur í tímann. Þá er líka mikilvægt að gangast við því, þakka fyrir leiðréttingar og biðja einfaldlega bara afsökunar.

Formaðurinn skilur ekki af hverju fjallað var um í fréttinni að stofnaður hafi verið stýrihópur um Þjóðhátíð síðsumars 2008. Um það var fjallað svo að kjörnir fulltrúar sem fjalla um þessi mál í dag átti sig betur á sögunni og skilji að hugað var vel að öllum þessum málum á stærsta vaxtaskeiði Þjóðhátíðar.

Í umræddum stýrihóp sátu Elliði Vignisson, Páll Scheving, Birgir Guðjónsson, Tryggvi Már Sæmundsson, Sigurjón Andrésson og Ólafur Þ Snorrason. Á þessum árum var verulega miklu áorkað í tengslum við alla umgjörð og sjálft hátíðarsvæðið á Þjóðhátíð.

Það er hlutverk fjölmiðla að að fylgjast með, upplýsa almenning og benda á ef rangt er farið með.

Tryggvi Már Sæmundsson

Ritstjóri