Trausti Hjaltason, bæjarfulltrúi:

„Nánast látið eins og stjórn Herjólfs ohf. sé eitthvað einkamál bæjarstjórans”

11.Ágúst'18 | 06:15
herj_nyr_cr_sa_c

Tölvugerð mynd af nýrri Vestmannaeyjaferju. Mynd/Crist S.A

Á miðvikudaginn var, var haldinn hluthafafundur hjá Herjólfi ohf. Þar var gerð smávægileg breyting á stjórninni þar sem einum stjórnarmanni var skipt út fyrir annan. Eyjar.net spurði Trausta Hjaltason, bæjarfulltrúa Sjálfstæðisflokksins út í málið.

„Eins og komið hefur fram þá voru fulltrúar Sjálfstæðisflokksins afar ósáttir við að verið væri að setja á stjórnarkjör á þessum tímapunkti. Aðdragandinn var klaufalegur og til þess eins að valda ósætti í máli sem við höfum ætíð lagt áherslu á að vinna í sameiningu. Boðað var til stjórnarkjörs án nokkurar umræðu í bæjarstjórn eða bæjarráði þrátt fyrir að félagið sé að fullu í eigu Vestmannaeyjabæjar. Nánast látið eins og stjórn Herjólfs ohf. sé eitthvað einkamál bæjarstjórans, en ekki mikilvægasta mál okkar allra sem hér búum.” segir Trausti.

Stjórn ohf. sem sett var saman í góðri sátt og staðið sig vel í sínum störfum

Hann segir staðreyndina vera að þetta verkefni sé eitt mikilvægasta hagsmunamál samfélagsins og er afar mikilvægt að það sé klárað á faglegan og öruggan hátt. „Í yfir áratug hafa allir bæjarfulltrúar, svo ekki sé nú minnst á bæjarstjórann, kappkostað að halda samstöðu og vinna af heilindum. Þannig hefur tekist að halda póltískri forystu í þessu mikilvæga máli. Nú virðist sá tími því miður liðinn.

Mat okkar sjálfstæðismanna er að stjórn ohf. sem sett var saman í góðri sátt hafi staðið sig vel í sínum störfum, verkefnið er farið af stað og er mikilvægt að því sé fylgt vel eftir næstu misseri.”

Á erfitt með að skilja þörfina fyrir allt þetta upphlaup

Trausti segir að Sjálfstæðisflokkurinn hafi verið ánægður með alla í stjórninni og ekkert verið að velta sér upp úr flokkslitum fólks. „Við vildum því einfaldlega gefa þessu góða fólki ráðrúm til að vinna áfram. Það vildi hinn nýi meirihluti ekki og svo vísað sé í orð bæjarstjóra þá sagði hún að gera þyrfti breytingar á stjórn til að tryggja að hún endurspegli flokksliti bæjarstjórnar og tryggja faglega stöðu hennar. Niðurstaðan var að taka út stjórnarmann með gríðalega þekkingu á ferðaþjónustu hér í Eyjum.  Það var leiðin til að tryggja pólitíska réttsýni og faglega stöðu. Ég á þess vegna erfitt með að skilja þörfina fyrir allt þetta upphlaup.

Ég minni að lokum á að bæjarstjóri hefur ætíð gegnt algeru lykilhlutverki þegar kemur að samgöngum. Það á bæði við um pólitíska forystu, samstöðu meðal bæjarfulltrúa og að vinna málin.  Það eru næg verkefni framundan fyrir bæjarstjóran og við söknum þess að vita ekkert um hvernig kojumálum verður háttað, fá fréttir af vinnu við nýtt bókunarkerfi, ekki hefur verið kynnt hvernig áætlun verður háttað og ekki einu sinni hefur verið kynnt hvernig brugðist verði við þeim töfun sem orðið hafa á framkvæmdum við Landeyjahöfn sem fyrirsjáanlega verða til þess að frátafir í siglingum í Landeyahöfn aukast. Þetta eru allt hlutir sem þurfa að komast á hreint sem allra fyrst.”

Má ekki líta á þetta sem varnarsigur fyrir Sjálfstæðisflokkinn að þeir þrír sem skipaðir voru í stjórnina af hálfu flokksins séu allir í henni áfram?

Við erum fyrst og fremst óánægð með að það skuli yfir höfuð þurft að vera að hræra í stjórninni á þessum tímapunkti. En úr því að það var gert þá var best að það væri sem minnst um breytingar, og þeir sem eru búnir að vera í verkefninu frá upphafi skuli fá að halda áfram sínum störfum, segir Trausti Hjaltason, bæjarfulltrúi Sjálfstæðisflokksins.

 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.