Uppfærð frétt

Ein breyting gerð á stjórn Herjólfs ohf.

8.Ágúst'18 | 15:43

Fyrirtæki Vestmannaeyjabæjar tekur við rekstri nýrrar ferju í lok árs. Mynd/Crist S.A

Í dag var haldin hluthafafundur hjá Herjólfi ohf. Grímur Gíslason, stjórnarformaður Herjólfs ohf. sagði í samtali við Eyjar.net að þar hafi formaður stjórnar farið yfir stöðu mála og þau verk sem unnið hefur verið að frá stofnun félagsins.

Kosin var stjórn á fundinum og var ein breyting gerð á aðalmönnum. Kristín Jóhannsdóttir, fulltrúi E-lista gekk úr stjórn og inn kom Dóra Björk Gunnarsdóttir, frá H-lista.

Uppfært kl. 16.16:

Grímur skipaður af meirihlutanum

Íris Róbertsdóttir, bæjarstjóri segir í samtali við Eyjar.net að meirihluti bæjarstjórnar hafi skipað þau Dóru Björk Gunnarsdóttur, Lúðvík Bergvinsson og Grím Gíslason í stjórnina. Grímur sat áður sem fulltrúi Sjálfstæðisflokksins í stjórninni.

Aðspurð um hvort ekki skjóti skökku við að skipa mann áfram í stjórn, sem áður sat fyrir hönd Sjálfstæðisflokksins segir Íris að meirihlutanum hafi þótt sérstakt að minnihlutinn skildi ekki vilja halda Grím inni í stjórninni, sér í lagi af því hann var stjórnarformaður og með yfirsýn yfir allt verkefnið. Vegna stöðu verkefnisins hafi nýjum meirihluta þótt það mikilvægt fyrir verkefnið að hann sæti áfram í stjórn Herjólfs ohf. og vorum við að horfa þar til faglegra forsenda.

Stjórnina skipa nú: Lúðvík Bergvinsson, Páll Guðmundsson, Dóra Björk Gunnarsdóttir, Arndís Bára Ingimarsdóttir og Grímur Gíslason

Varamenn eru Birna Þórsdóttir Vídó og Halldór Bjarnason