Fjármagnið sem sparaðist hefði átt að nýtast áfram í Eyjum

3.Júlí'18 | 06:53
hsu_eyjar

Heilbrigðisstofnun Vestmannaeyja sameinaðist öðrum heilbrigðisstofnunum á Suðurlandi árið 2014. Mynd/TMS

Birgir Þórarinsson, þingmaður Miðflokksins sendi í byrjun mars fyrirspurn á Svandísi Svavarsdóttur, heilbrigðisráðherra varðandi fjárveitingar til Heilbrigðisstofnunar Vestmannaeyja, fjölda ársverka og þróun launakostnaðar. Svar liggur nú fyrir frá ráðherra.

Birgir segir í samtali við Eyjar.net að svarið staðfesti það að sameiningin við HSU hafi falið í sér fækkun stöðugilda í Vestmannaeyjum um 5 ársverk. Árið 2013 voru þau 67,5 en árið 2017 eru þau 62.

Skýrist fyrst og fremst af launahækkunum og launaskriði

Hann segir að í svarinu sé sett fram tafla sem sýni rekstrarkostnað og hækkun framlaga til HSV en á sama tíma færri stöðugildi á launum. Þetta skýrist fyrst og fremst af launahækkunum og launaskriði en ekki aukinni starfsemi eða þjónustu.

Dýrustu stöðugildin voru lögð niður í Eyjum við sameininguna

„Í svarinu kemur fram að fækkun hafi átt sér stað í hópi æðstu stjórnenda HSV. Dýrustu stöðugildin voru því lögð niður í Eyjum við sameininguna. Ekki er hægt að sjá að sá launasparnaður sem því fylgdi hafi nýst stofnuninni. Ég er þeirrar skoðunar að fjármagnið sem sparaðist við þessa ráðstöfun hefði átt að nýtast áfram í Eyjum, í heilbrigðisþjónustu við íbúanna. Auk þess varð bæjarfélagið af útsvarstekjum við þessa breytingu.” segir Birgir og bætir við að hann muni fylgja þessu máli eftir í fjárlagavinnunni fyrir árið 2019, sem hefst í haust.

 

Spurningarnar og svör heilbrigðisráðherra má sjá hér að neðan:


     1.      Hver hefur þróun fjárveitinga til Heilbrigðisstofnunar Vestmannaeyja verið frá árinu 2013 og til ársins 2017 sem og þróun í fjölda ársverka?
    Heilbrigðisstofnunin í Vestmannaeyjum, Heilbrigðisstofnun Suðausturlands og Heilbrigðisstofnun Suðurlands voru sameinaðar í eina stofnun, Heilbrigðisstofnun Suðurlands, 1. október 2014 með reglugerð nr. 674/2014. Fjárveitingar til starfsstöðvanna voru sameinaðar í eina fjárhæð í fjárlögum 2014. 
    Rekstrarkostnaður starfsstöðva er aðgreindur í bókhaldi Heilbrigðisstofnunar Suðurlands og sýnir eftirfarandi tafla rekstrarkostnað ásamt fjölda ársverka hjá Heilbrigðisstofnun Suðurlands í Vestmannaeyjum að frádregnum sértekjum árin 2013–2017 á verðlagi hvers árs í þúsundum króna. 
 

  2013 2014 2015 2016 2017
Rekstr­ar­kostnaður 791.649 818.415 839.838 920.290 1.060.827
Breyt­ing frá fyrra ári   26.766 21.423 80.452 140.537
Breyt­ing í %   3,4% 2,6% 9,6% 15,3%
           
Árs­verk 67,5 63,0 59,7 61,7 62,0


     2.      Hver hefur þróun fjárveitinganna verið á föstu verðlagi? 
    Eftirfarandi tafla sýnir rekstrarkostnað árin 2013–2017 á meðalverðlagi ársins 2017. 
 

  2013 2014 2015 2016 2017
Rekstr­ar­kostnaður 849.771 860.978 869.272 936.569 1.060.827
Breyt­ing frá fyrra ári   11.207 8.294 67.297 124.258
Breyt­ing í %   1,3% 1,0% 7,7% 13,3%


     3.      Hvað skýrir breytingar í fjölda ársverka? 
    Haustið 2014 sameinuðust Heilbrigðisstofnun Suðausturlands, Heilbrigðisstofnunin í Vestmannaeyjum og Heilbrigðisstofnun Suðurlands í eina stofnun; Heilbrigðisstofnun Suðurlands, sbr. 1. tölul. Fækkun ársverka á starfsstöð stofnunarinnar í Vestmannaeyjum skýrist af því að ný og sameinuð Heilbrigðisstofnun Suðurlands (HSU) lýtur nú einni yfirstjórn þannig að fækkun hefur átt sér stað í hópi æðstu stjórnenda, svo sem forstjóra, lækningaforstjóra, hjúkrunarforstjóra og innkaupastjóra. Öll þessi stöðugildi voru full stöðugildi, skilgreind hjá Heilbrigðisstofnuninni í Vestmannaeyjum en í dag eru þau skilgreind á skrifstofu forstjóra Heilbrigðisstofnunar Suðurlands, óháð eiginlegri staðsetningu starfsmannsins. Árið 2016 var eitt stöðugildi rekstrarstjóra hjá HSU í Vestmannaeyjum lagt niður. Á sama ári fengust til starfa tveir nýir heilsugæslulæknar í Vestmannaeyjum í stað verktakalækna áður og eru þau störf enn setin. Þessi atriði skýra í megindráttum breytingar og þróun ársverka hjá HSU í Vestmannaeyjum frá 2013 til ársloka 2017. 

     4.      Hver hefur árleg þróun launakostnaðar starfsstétta stofnunarinnar verið í samanburði við þróun fjárveitinga sem ætlaðar eru til greiðslu launakostnaðar? 
    Ekki er hægt að sjá fjárveitingar á fjárlögum til greiðslu launakostnaðar í Vestmannaeyjum. Eftirfarandi upplýsingar eru sóttar í bókhald stofnunarinnar og sýna launakostnað á starfsstöð stofnunarinnar í Vestmannaeyjum. 
 

  2013 2014 2015 2016 2017
Laun í þús. kr. 613.022 578.525 578.405 619.395 665.512
Meðallaun á hvert ár­s­verk 9.082 9.183 9.689 10.039 10.734
Breyt­ing frá fyrra ári   101 506 350 695
Breyt­ing í %   1,1% 5,5% 3,6% 6,9%


    Eftirfarandi tafla sýnir heildarframlög til launa hjá Heilbrigðisstofnun Suðurlands samkvæmt fjárlögum. 
 

  2013 2014 2015 2016 2017
Heild­ar­fram­lag til launa hjá HSU í millj. kr. 2.749,5 2.811,2 2.901,0 3.344,4 3.693,7
Breyt­ing frá fyrra ári, millj. kr.   61,7 89,8 443,4 349,3
Breyt­ing í %   2,2% 3,2% 15,3% 10,4%

                         
     5.      Ef fjárveitingar hafa lækkað að raungildi frá því að stofnunin varð hluti af Heilbrigðisstofnun Suðurlands, hverjar eru ástæður þess? 
    Rekstrarkostnaður Heilbrigðisstofnunar Suðurlands í Vestmannaeyjum að frádregnum sértekjum er 24,8% hærri árið 2017 en árið 2013 á meðalverðlagi ársins 2017. Verðlagshækkun sama tímabils er um 7,3%.

 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.