Arnar Hjaltalín skrifar:

Órofin samstaða er forsenda árangurs

31.Maí'18 | 17:55
drifandi_ads

Ljósmynd/aðsend

Drífandi hefur verið í góðu samstarfi við stéttarfélögin við suðurströndina, stéttarfélaga sem ná allt frá Sandgerði allt til sandanna í suðaustri. Hafa félögin meðal annars haldið sameiginleg trúnaðarmannanámskeið og verið í margvíslegu öðru samstarfi.

Formenn og varaformenn félaganna hittust í Vestmannaeyjum fyrir stuttu og funduðu. Skoðuðu sig um í Vestmannaeyjum og hittu stjórn Drífanda. Á fundinum komu kjarasamningarnir framundan að sjálfsögðu til tals, einnig óróleiki og ósætti sem hefur verið langvarandi en er nú komið upp á yfirborðið í hreyfingunni.

Hafa talsmenn allra þessara félaga miklar áhyggjur af stöðunni, því það versta sem getur komið fyrir okkur er að fara sundruð og í ósætti inn í næstu kjarasamninga. Kjör og hagsmunir verkafólks eiga að vera það eina sem við einblínum á innan hreyfingarinnar, en ekki einstaka persónur. Hreyfingin er mikið stærri og mikilvægari en að svo megi verða.

Félögin munu halda þessu samstarfi áfram og undirbúa sameiginlega kröfugerð með þátttöku trúnaðarmanna og trúnaðarráða félaganna í september næstkomandi. Kröfugerð sem lögð verður fyrir samninganefnd Starfsgreinasambandsins í undirbúningi kjarasamninga sem lausir eru um næstu áramót.

Þing ASÍ verður haldið í október n.k. Í aðdraganda þingsins og á þinginu sjálfu munu verða straumhvörf í forystu og stjórnarháttum Alþýðusambandsins sem er löngu kominn tími til. Þingið er rétti vettvangurinn til þeirra breytinga en ekki fjölmiðlar. Þar munu félög verkafólks leggjast sameinuð á eitt málefni sem brennur á svo mörgum sem eru hagsmunir láglaunafólks. Brotthvarf frá láglaunastefnu, heilsugæsla, húsnæðismál, menntamál skattkerfisbreytingar og annað sem brennur svo heitt á okkur munu verða sett þar í forgang. Þar munum við stilla saman strengi okkar og ná fram órofa samstöðu sem ekkert stenst og þá eru okkur allir vegir færir inn í næstu samninga.

Formaður Drífanda hitti einnig Sólveigu Önnu formann Eflingar í vikunni og ræddi við hana ýmis mál er snúa að launafólki. Einnig uppbyggingu Eflingar og Drífanda, hve ólík félögin væru við fyrstu sín vegna stærðar og samsetningar, en stefndu þó að einu sameiginlegu markmiði. Markmiði og mikilvægi þess að þar vinni fólk sameinað að því sem skiptir máli sem eru auðvitað málefni og hagsmunir verkafólks á Íslandi. Allir félagsmenn beggja félaganna hafa sömu væntingar og þrár til betra lífs og geta lifað mannsæmandi lífi af launum sínum.

Þriðjudaginn 5. júní verður haldinn félagsfundur hjá Drífanda þar sem verður farið yfir ferlið í aðdraganda kjarasamninga, uppbyggingu launatöflunnar og önnur atriði er lúta að kjarasamningnum.

Mætum öll

 

Arnar Hjaltalín

 

Höfundur er formaður Drífanda - stéttarfélags.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Lumar þú á grein?

15.Febrúar'18

Endilega sendu okkur hana á eyjar@eyjar.net. Eyjar.net - fyrir alla. 

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.