Elliði Vignisson skrifar:

Staðan er önnur nú

- mikilvægt að fólk kjósi þá sem það treystir best

14.Maí'18 | 16:31
ev_2

Elliði Vignisson

Ég hafði setið í stóli bæjarstjóra í fáeinar mínútur.  Ef ég man rétt þá var rjómablíða og fyrir utan gluggann á skrifstofunni suðaði sláttuorf og lykt af nýslegnu grasi barst inn.  Ég hélt á bláum kaffibolla sem ég hafði tekið með mér á nýjan vinnustað.  Á honum stóð „Besti pabbi í heimi“, gjöf frá börnunum mínum.    

Ég man glögglega hve stoltur og glaður ég var yfir þeirri staðreynd að í kjölfarið á ömurlegu kjörtímabili -þar sem þrír flokkar skiptust á að mynda alla mögulega meirihluta- fékk ég nú tækifæri til að leiða okkur Sjálfstæðisfólk og axla ábyrgð á stöðunni.  Þessi velllíðan var hinsvegar rofin þegar fyrir mig voru lögð fyrstu skjölin.  Fyrsta verkefnið var að skrifa undir lánasamning til að geta greitt út laun.  Sú var staðan.

Nýr bæjarstjóri vissi fyrir að fjárhagsstaðan var þung.  Það sem verra var, hver höndin var uppi á móti annarri innan stjórnmála sem utan.  Íbúar voru komnir niður undir 4000 og hafði fækkað um hátt í 20% á 15 árum.  Þjónusta sveitarfélagsins þoldi ekki samanburð og sífellt fleiri ætluðu að flytja frá Eyjum.  Lítið hafði verið framkvæmt og víða þörf á grettistaki í viðhaldi eigna og nýframkvæmdum til að bæta þjónustuna.  Ekki var þó bætandi á skuldaklafann enda sveitarfélagið þegar undir eftirliti fjárhagsnefndar sveitarfélaga. 

Síðan þá hefur umhverfið verið okkur hagstæðara.  Allt þar til upp kom klofningur hjá okkur Sjálfstæðisfólki, vegna innanflokksátaka, hafði að mestu ríkt friður og eining í bæjarpólitíkinni þar sem áhersla var lögð á samvinnu og samstarf.  Allar gömlu leiðinda kjaftsögurnar -sem bara skaða og særa- voru við það verða hluti af fortíð sem við héldum að enginn vildi aftur.   

Vestmannaeyjar eru í dag meðal sterkustu sveitarfélaga á landinu öllu.  Íbúum hefur fjölgað nánast stöðugt frá 2007, yfir 90% skulda hafa verið greiddar niður, búið er að byggja nýtt knattspyrnuhús, Eldheima, útisvæði við sundlaugina, nýja skipalyftu, viðbyggingu við Hraunbúðir og svo margt fl. sem of langt mál væri að telja upp.  Þjónusta hefur verið stóraukin fyrir alla þjónustuþega.  Það á til að mynda við um eldri borgara, barnafólk, íþróttafólk, fatlaða og marga fleiri.  Það sem mestu skiptir er samt að íbúar eru bæði ánægðir og stoltir af bæjarfélaginu sýnu.  Þeir hafa á ný fundið samstöðuna sem alltaf er forsenda árangurs.

Í dag sit ég enn í sama stóli bæjarstjóra og góðviðrisdaginn þegar ég byrjaði.  Illu heilli datt blái bollinn frá börnunum hinsvegar í gólfið og brotnaði fyrir fáeinum árum þegar vinkona mín rak sig óvart í hann á fundi.  Í staðinn nota ég bolla sem var gjöf frá barnahópi sem eitt sinn heimsótti mig á skrifstofuna.  Ég er jafn stoltur af mínum heimabæ, að sumu leyti stoltari en áður.  Hef fengið að verða vitni að því þrekvirki sem bæjarbúar geta unnið þegar þeir standa saman um velferð Vestmannaeyja.  Handviss um að hægt er að gera lífið enn betra í Vestmannaeyjum.

Komandi kosningar eru þær tvísýnustu í áratugi hér í Eyjum. Þótt flokkarnir séu þrír eru valkostirnir í raun bara tveir.  Falli meirihluti okkar Sjálfstæðisfólks þá verður myndaður meirihluti hinna flokkanna tveggja.  Sjálfstæðisflokkurinn fer þá í minnihluta og sjálfur mun ég hverfa til annarra verka fullur þakklætis fyrir þau forréttindi sem mér hafa verið veitt að fá að taka þátt í stjórnun Vestmannaeyjabæjar seinustu árin.  Séu bæjarbúar hins vegar ánægð með störf okkar og fáum við Sjálfstæðfólk til þess umboð, munum við glöð og keik ganga til þeirra verka sem nú bíða og gera lífið betra í Vestmannaeyjum. 

Árangur er ekki sjálfgefinn.  Á bak við hann er vinna, þor og þrek.  Það er því mikilvægt að fólk kjósi þá sem það treystir best til að stjórna bæjarfélaginu.  Það er nefnilega munur, bæði á fólki og framboðum.

 

Elliði Vignisson

bæjarstjóri

 

Höfundur skipar 5. sæti á lista Sjálfstæðisflokksins í komandi sveitarstjórnarkosningum.

ÓE íbúð fyrir þjóðhátíð 2019

7.Ágúst'18

Erum lítill hópur sem vantar að leigja íbúð yfir þjóðhátíð :) Erum snyrtileg, reglusöm og reyklaus ! Alltaf í góðu skapi og kurteis :)

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.