Hvalagriðland Merlin á lokametrunum

- kostnaður við uppbygginguna er á annan milljarð króna

29.Mars'18 | 00:35
mjaldrar

Til stendur að flytja mjaldra frá Shjanghæ til Eyja.

Undirbúningur fyrir hvalagriðland sem afþreyingarfyrirtækið Merlin og Vestmannaeyjabær hafa unnið að í þrjú ár er á lokametrunum. Verkefninu hefur vaxið fiskur um hrygg því forsvarsmenn Merlin ætla að setja upp einstakt fiska- og sjófuglasafn á jarðhæð Fiskiðjunnar.

Kostnaður við uppbygginguna er á annan milljarð króna, samkvæmt upplýsingum fréttastofu, en greint er frá málinu á ruv.is.

Farið var yfir samstarf bæjarins og Merlin Entertainment á fundi bæjarráðs Vestmannaeyja á þriðjudaginn.

Í fundargerð kemur fram að verkefnið sé fólgið í því að flytja hingað hvali sem verið hafa sýningardýr og búa þeim umhverfi sem „er í anda þeirrar dýravelferðar sem Merlin leggur áherslu á í allri sinni starfsemi,“ segir í fundargerðinni. 

Eins og fram hefur komið í fréttum RÚV stendur til að flytja mjaldra (e. beluga) frá Shjanghæ til Eyja en einn þeirra, Jun Jun, dó vegna veikinda á síðasta ári. Bæði sjávarútvegsráðuneytið og Matvælastofnun hafa gefið grænt ljós fyrir komu mjaldranna en byggja á upp aðstöðu sem yrði einstök í heiminum. Hvalirnir geta verið í stóru keri á landi en líka í kví í sjó.

Þótt hvalirnir verði áfram í aðalhlutverki hefur verkefnið þróast. Merlin stefnir einnig að því vera með fiska- og sjófuglasafn undir vörumerkinu SeaLife. Fram kemur í fundargerð bæjarráðs að þar verði til sýnis staðbundnar tegundir sjávardýra og úrvalsaðstaða til að sinna pysjueftirliti. Jafnvel væri hægt að hýsa lifandi lunda sem ekki geta lifað í villtri náttúru.

Undirbúningurinn er í fundargerðinni sagður vera á lokametrunum. Merlin hefur þegar fengið lóð á gamla Ísfélagsreitnum og unnið er að umsókn fyrir kví í Klettsvík. Þá mun bærinn leigja Merlin tæplega þúsund fermetra aðstöðu á jarðhæð Fiskiðjunnar undir fiska- og sjófuglasafnið.  

„Bara fyrir okkur að ná tengslum við svona stórt fyrirtæki og eiga hjá þeim áhuga og velvilja er frábært,“ segir Elliði Vignisson, bæjarstjóri í Vestmannaeyjum, í samtali við fréttastofu en Merlin rekur meðal annars Lego-skemmtigarðana og parísarhjólið London Eye. 

Elliði telur að til verði 10 til 15 ný störf með tilkomu Merlin-verkefnsins en tekur þó fram að bærinn hafi enga viðskiptalega aðkomu og komi ekki að beinum rekstri. „Þetta er ævintýralega stórt fyrirtæki á heimsvísu og bara á síðasta ári tóku þeir á móti 62 milljónum gesta sem er 60 milljónum meira en við gerðum sem þjóð. “

Samkvæmt upplýsingum fréttastofu er kostnaðurinn við uppbyggingu Merlin í Vestmannaeyjum á annan milljarð króna. Elliði vill ekki tjá sig um neinar tölur en segir ljóst að þetta sé gríðarlega stórt verkefni. 

 

Ruv.is

Allt fasteignir - Fasteignasalan Eldey

27.Október'17

Fasteignasalan Eldey Vestmannaeyjum. Sími: 861-8901. Arndís M. Kjartansdóttir löggiltur fasteigna-, fyrirtækja- og skipasali. Goðahrauni 1. disa@alltfasteignir.is / www.alltfasteignir.is. Söluþóknun aðeins 1,1%

Fáðu nýjustu fréttirnar beint í æð

10.September'18

Með því að fylgja Eyjar.net færðu nýjustu fréttirnar frá Eyjum beint í æð. Smelltu hér til að fara á facebook-síðu Eyjar.net.

Afmælisár Vestmannaeyjabæjar - Dagskrá

15.Apríl'19

Í ár fagnar Vestmannaeyjabær 100 ára kaupstaðarafmæli. Af því tilefni er fjölbreytt dagskrá allt árið. Hér má skoða dagskrá ársins.

Smáauglýsingar

Hér getur þú með einföldum hætti auglýst það sem þú þarft að koma á framfæri allt frá einum sólarhring uppí einn mánuð. Einfaldur greiðslumáti Þú greiðir fyrir auglýsinguna með kreditkorti. Verð kr. 500,- per sólarhring. Um auglýsinguna Stutt fyrirsögn, hámark 35 tákn. Hnitmiðaður texti, hámark 130 tákn. Mynd á JPG sniði, verður sköluð í 130x100 díla (pixel).