Dæmdur fyrir fíkniefnasmygl á Þjóðhátíð

16.Mars'18 | 23:31
heradsdomur_sudurlands

Héraðsdómur Suðurlands

Héraðsdómur Suðurlands dæmdi í morgun karlmann á þrítugsaldri í tíu mánaða fangelsi, þar af sjö mánuði skilorðsbundna, fyrir fíkniefnalagabrot en hann var handtekinn á Þjóðhátíð í Eyjum með fíkniefni í ferðatösku fyrir tveimur árum. 

Maðurinn sagðist fyrir dómi hafa verið þvingaður til að flytja efnin til Eyja fyrir aðra menn sem hann þorði ekki að segja hverjir væru þar sem hann óttaðist að þeir myndu gera fjölskyldu hans mein. Ruv.is greinir frá.

Fram kemur í dómi héraðsdóms að lögreglan hafi komið auga á manninn og bróður hans þegar hún var við almennt fíkniefnaeftirlit við hótel í bænum á Þjóðhátíð í Vestmannaeyjum.

Eftir því var tekið að fát hafi komið á bræðurna þegar þeir urðu varir við lögreglu og var ákveðið að ræða við þá. Leyfi fékkst til að leita á þeim en ekkert fannst. Bræðurnir fóru þá rakleiðis inn á hótelið og virtust forðast frekari afskipti lögreglu en sú hegðun leiddi þó eingöngu til þess að lögreglan fór að fylgjast með þeim.

Og það bar árangur. Síðar um kvöldið kom í ljós að maðurinn hafði falið umtalsvert magn fíkniefna í grárri ferðatösku en við leit lögreglu fundust 136 grömm af kókaíni, 181 MDMA - tafla og 60 grömm af amfetamíni. 

Maðurinn  sagðist í skýrslutöku hjá lögreglu hafa tekið verkefnið að sér gegn greiðslu og að þetta hefði verið heimska af sinni hálfu. Hann hefði átt að fá 200 til 300 þúsund krónur en ekki fengið greitt. Hann myndi ekki segja til þeirra sem fengu hann til verksins vegna hræðslu. Hann hafi átt að afhenda efnin og talið að það ætti að selja þau. 

Fyrir dómi sagði maðurinn að hann hefði skuldað þessum mönnum pening. Hann hefði verið í fíkniefnaneyslu en væru hættur. Gefið hefði verið í skyn að skuldin yrði felld niður að hluta eða öllu leyti ef hann gengist inn í þetta verk. Hann hafi verið hræddur um heilsu sína og jafnframt óttast að þessir menn myndu gera fjölskyldu hans eitthvað.  Hvatinn hafi því verið að hann og móðir hans yrðu ekki fyrir barsmíðum og eignaspjöllum.

Hann hafi heldur ekki vitað hvort efnin væru ætluð til sölu eða hvort mennirnir hefðu ætlað að nota efnin sjálfir við skemmtanir um Þjóðhátíð.

Héraðsdómur féllst ekki á þessar skýringar mannsins því við skýrslutöku hjá lögreglu hefði hann ekki lýst neinni hræðslu eða þvingun af neinu tagi sem hafi verið orsök þess að hann tók verkefnið að sér. Dómurinn horfði þó til þess að maðurinn hefði ekki verið skipuleggjandi né frumkvöðull að brotunum, nokkuð væri um liðið og maðurinn hefði á þeim tíma snúið lífi sínu til betri vegar en hann væri í skóla að læra rafvirkjun. 

 

Ruv.is

Viðhorfskönnun til samgangna og bæjarmála

24.Desember'17

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2017.

Má bjóða þér að auglýsa hér?

15.Janúar'18

Hér má auglýsa allt milli himins og jarðar! Sendu línu á auglysingar@eyjar.net og saman finnum við lausn sem hentar þér.

Fréttaskot - Eyjar.net

31.Janúar'18

Ertu með athyglisverða ábendingu eða frétt?
Sendu okkur línu á eyjar@eyjar.net - Fyllsta trúnaðar gætt.

Viðhorfskönnun til samgangna og bæjarmála

2.Nóvember'18

Áhugavert efni - Hér getur þú skoðað viðhorfskönnun til samgangna og bæjarmála í Vestmannaeyjum sem Eyjar.net lét gera í október 2018.